தமிழரசுக் கட்சியின்புதிய தலைவரினால் சீர் செய்யப்படவுள்ள வாய்ப்புக்கள் மிக அரிதே!

தமிழரசுக் கட்சியின் கடந்த அரை நூற்றாண்டுகளுக்கு மேலான தவறுகள்
புதிய தலைவரினால் சீர் செய்யப்படவுள்ள வாய்ப்புக்கள் மிக அரிதே!

நக்கீரன்

 கடந்த சனவரி 02, 2024 அன்று கனடா உதயன் வார ஏட்டில் மேலேயுள்ள தலைப்பில் எழுதப்பட்ட தலையங்கத்துக்கான எதிர்வினை.

(1) தமிழ் மக்கள் இது வரை அடைந்த துன்பங்களை சிங்கள மக்கள் அனுபவிக்க தொடங்கி விட்டனர். இதனால் அரசு அச்சத்தில் மூழ்கியுள்ளது. இதுவும் தமிழர்களுக்கான பாதை திறக்க வழியாகும். ஆகவே நாம் எல்லோரும் இணைந்து ஒருமிக்க வேண்டிய காலகட்டம் என இலங்கை தமிழரசுக் கட்சியின் புதிய தலை வர் சிறிதரன் சிவஞானம் தெரிவித் துள்ளதாக செய்தியொன்று எழுதப்பட்டுள்ளது. அத்துடன் அவர் தெரிவிற்கான வாக்கெடுப்பில் வெற்றிபெற்றதாக அறிவிக்கப்பட்ட பின்னர் கிளிநொச்சி சென்று அங்கு மாவீரர்களின் நினைவிடங்களுக்குச் சென்று அவர்களுக்கு மரியாதையையும் அஞ்சலியையும் செலுத்தினார். அங்கு அவர் உரையாற்றும் போது “மாவீரர்களின் கனவு நனவாகும் வரை நாம் உழைப்போம்’ என்று தெரிவித்துள்ளார்.

பதில்: ‘தமிழீழக் கனவு’ மே 18, 2009 அன்று கனவாகவே போய்விட்டது. தலைவர் பிரபாகரனால் முடியாமல் போன தமிழீழத்தை சிறிதரன் வென்று தருவார் என்பது பகற்கனவு. இன்றைய பூகோள அரசியலில் இலங்கைத் தீவில் இன்னொரு தனியரசு சாத்தியமில்லை. அதனை எந்தவொரு பேரரசோ அல்லது பிராந்திய அரசோ ஆதரிக்காது. காரணம் இந்த நாடுகள்தான் தமிழீழ விடுதலைப் புலிகளை துடைத்து  அழித்தவர்கள். 13ஏ திருத்தத்தை நடைமுறைப்படுத்துமாறு கரடியாகக் கத்திக் கொண்டிருக்கிறோம். இலங்கை – இந்திய உடன்பாட்டை எழுதிய இந்தியாவே இப்போது கைவிரித்து விட்டது. “இலங்கை ஒரு இறைமையுள்ள நாடு. 13ஏ திருத்தத்தை நடைமுறைப்படுத்துமாறு இலங்கை அரசை எங்களால்  வற்புறுத்திக் கேட்க  முடியுமே ஒழிய அதற்கு மேல் ஒன்றும் செய்ய முடியாது. நீங்கள்தான் ஒற்றுமாக இருந்து இலங்கை அரசுக்குப் போராட வேண்டும்”.  இதுதான் தன்னைச் சந்தித்த தமிழ்த் தேசியக் கட்சிகளின் தலைவர்களிடம் இந்தியாவின் புதிய தூதுவர் ஸ்ரீ சந்தோஷ் ஜா சொன்ன செய்தி! 13ஏ திருத்தத்துக்கே நாம் தவண்டை அடிக்கும் போது தமிழீழக் கனவு  நினைவாகும் என எதிர்பார்ப்பது புத்திசாலித்தனமா? காசாவை இஸ்ரேல் படைகள் தரை, வான் மார்க்கமாக குண்டு போட்டு துவம்சம் செய்கிறது. இந்த கணம் வரை 26,000 பேர் கொல்லப்பட்டுள்ளார்கள். இரண்டு மடங்கு பேர் படுகாயம் அடைந்துள்ளார்கள். ஆனால்  தென்னாபிரிக்கா ஒன்று மட்டும் காசாவில் நடப்பது இனப்படுகொலை என்று  சொல்லி சர்வதேச நீதிமன்றத்தை நாடியுள்ளது. சாதகமான தீர்ப்பு வந்தாலும் அது ஒரு தார்மீக வெற்றியாக மட்டுமே இருக்கும். சர்வதேச நீதிமன்றத்துக்கு தண்டிக்கும் அதிகாரம் இல்லை.

(2) அதற்கு முன்பதாக திருகோணமலையில் அவர் தலைவராக தேர்ந்தெடுக்கப்பட்ட முடிவுகள் வெளியாகிய பின்னர் சுமந்திரன் போன்ற அனைவரோடும் சேர்ந்து  தமிழர்களின் பிரச்சனைகளை தீர்ப்பதற்கு உழைப்போம் என அறைகூவல் விடுத்துள்ளார். ஆனால் சுமந்திரன் அவர்களோ மாவீரர்களின் கனவு ‘கனவாகவே போகட்டும்’ என்று சபதம் எடுத்தவர். “விடுதலைப் புலிகளின் பல அரசியல் மற்றும் இராணுவ நகர்வுகளை தவறு என்று இன்னமும் உரத்த குரலில் சொல்லித் திரிகின்றவர். இவ்வாறானவர் எவ்வாறு சிறிதரன் சிவஞானம் அவர்களோடு சேர்ந்து அரசியல் செய்யப்போகின்றார் என்பது எம்மால் புரிந்து கொள்ள முடியாமல் உள்ளது.

பதில். சுதந்திரன் அவர்கட்கு மட்டுமல்ல, சிந்திக்கத் தெரிந்த, பூகோள அரசியலைத் தெரிந்தவர்களுக்கு அது கனவா கத்தான்  தெரியும். ஆகாயத்தில் கோட்டை கட்டுபவர்களுக்கு மட்டும் அது நனவாகத் தெரியும்.  தலைவர் பிரபாகரனால் அடைய முடியாத தமிழீழத்தை மற்றவர்கள் பெற்றுத் தருவார்கள் என்பது பகற் கனவு. சிறிதரன் மக்களை உசுப்பேத்த தமிழீழத்தை கையில் எடுத்துள்ளார். ஆனால் தமிழரசுக் கட்சி தமிழீழம் கேட்கவில்லை. ஒன்றுபட்ட இலங்கையில் வட கிழக்கு பிரதேசத்தில் ஒரு இணைப்பாட்சி அரசை மட்டும் கேட்கிறது. வட்டுக்கோட்டைத் தீர்மானத்தை இதஅக கைவிட்டு விட்டது!

(3) தமிரசுக் கட்சி ஆரம்பிக்கப்பெற்று 75 ஆண்டுகள் நிறைவடைந்து விட்டன. தந்தை செல்வா தொடக்கம் சம்பந்தர் வரை தலைமை வகித்த எவராலுமே தமிழரசுக் கட்சியின் அடிப்படைக் கொள்கையான ‘சமஸ்டி’யை வென்றெடுக்க இயல வில்லை. அவர்களது பாராளுமன்ற அரசியல் நகர்ந்து சென்ற காலத்தை விட எமது விடுதலை இயக்கங்களின் நாற்பது வருடத்திற்கும் மேலான ஆயுதப்போராட்டத்தின் போது பாராளுமன்ற உறுப்பினர்களாக விடுதலைப்புலிகளின் ஆசீர்வாதத்தோடு பாராளுமன்ற சென்று அமைதியாக இருந்து விட்டு பின்னர் விடுதலை புலிகள் இயக்கம் மீதான தாக்குதல்கள் 2009ம் ஆண்டு நடத்தப்பட்ட பின்னர் அவர்களின் பாராளுமன்ற அரசியல் எந்தப் பக்கம் சென்றது என்பதற்கு அப்போதை தலைவர்கள் ;அடையாளங்களாக’ இன்னும் விளங்குகின்றார்கள்.

பதில்: 2001 ஆம் ஆண்டுக்குப் பின்னர் இலங்கைத் தமிழ் அரசுக் கட்சி வி.புலிகளின் கட்டுப்பாட்டில்தான் இருந்தது. “நாங்கள் எதைப் பேசச் சொல்கிறோமோ அதைத்தான் நீங்கள் நாடாளமன்றத்தில் பேச வேண்டும். நடக்க வேண்டும். இதன் காரணமாத்தான் சனாதிபதி சந்திரிகா குமாரதுங்க 2000 இல் கொண்டுவந்த “பிரதேசங்களின் ஒன்றியம்” என்ற மூல  யாப்பு நாடாளுமன்றத்தில் தோற்கடிக்கப்பட்டது. இந்த யாப்பு நீலன் திருச்செல்வன் மற்றும் ஜிஎல் பீரீஸ் இருவரும் வரைந்தது. இந்த யாப்புப் பற்றி பிற்காலத்தில் அன்டன் பாலசிங்கம் “எல்லா அரசியல் தீர்வு யோசனைகளை விட சந்திரிகாவின்  வரைவு  யாப்பு உச்சம்” என்று திருவாய் மலர்ந்தார். கண்கெட்ட பின் சூரிய நமஸ்காரம்!

(4) முக்கியமாக தங்களிடம் கேள்விகள் கேட்பதற்கு மக்களைத் தவிர ‘ஒருவரும்” இல்லை என்று எண்ணிக்கொண்டு ரணிலின் அரசாங்கத்தையும் அவரையும் காப்பாற்றத் துணிந்த அரசியல் ‘சாணக்கியத்திற்கு’ பரிசாக தற்போது சாணக்கியன் என்னும் பாராளுமன்ற உறுப்பினர் கிட்டியுள்ளார். அவரது அரசியல் நகர்வு மற்றும் பாராளுமன்ற பிரசன்னம் போன்றவை. தமிழரசுக் கட்சியின் பல அங்கத்தவர்கள் நினைப்பது போன்றே. ‘அரசியல் அறிவு’ மற்றும் ‘ஆங்கிலப் புலமை’ சர்வதே பயணங்களின் அனுபவங்கள்’ என்ற அவர்களது பார்வை மழுங்கியதாகத் தெரியவில்லை.

பதில்: ஒன்றும் புரியவில்லை. சிறிசேனா – இரணில் அரசை  உருவாக்குவதில் தமிழ்மக்கள்தான் பங்களிப்பு கணிசமாக இருந்தது. அந்த நல்லாட்சி அரசியல் வந்தபடியால் தான் வட கிழக்கில்  இராணவம், விமானப்படை, கடற்படை கைப்பற்றி இருந்த 47,000 ஏக்கர் காணியை விடுவித்தோம். பலாலி விமான நிலையம் யாழ்ப்பாண சர்வதேச விமான நிலையமாக அறிவிக்கப்பட்டது. 217 அரசியல் கைதிகளில் 112 கைதிகள் விடுவிக்கப்பட்டார்கள்.  ஒரு அரசியல்வாதிக்கு  ‘அரசியல் அறிவு’ மற்றும் ‘ஆங்கிலப் புலமை’  தேவையில்லை என்பது உங்களது வாதமா?

(5) இவ்வாறு “சுமந்திரன் ஒருவரே சர்வதேசம் வரை சென்று வாதிட்டு பேசக்கூடியவர்’ என்று கூறுகின்றவர்கள். விடுதலைப் புலிகள் தங்களிடத்தில் கொண்டிருந்த மக்கள் ஆதரவும். இராணுவ பலத்தையும் அவர்கள் நடத்திவந்த அரசியல் நகர்வுகளையும் மறந்தும் மறைத்தும் தங்கள் அரசியலை நடத்துவதும் ஏன் என்று எமக்கு புரிந்து கொள்ள முடியவில்லை.

பதில்: எல்லாம் சரி. முடிவு  என்ன? முள்ளிவாய்க்காலில் நடந்த  போரில் வெற்றியா?

(6) இவ்வாறான ‘மாயைகள்’ நிறைந்த தமிழர்களின் எதிர்கால அரசியலில் தமிழரசுக் கட்சி என்ன பங்கு வகிக்கப் போகின்றது என்பதற்கு அரசியல் அவதானிகளும் காத்திருப்பது போலத் தெரிகின்றது. அவர்களைப் போன்றே நாமும் காத்திருப்போம். எனினும். தமிழரசுக் கட்சியின் புதிய தலைவரான சிறிதரன் சிவஞானம் தனது உரையில் தெரிவித்துள்ள கருத்துக்களுக்கு மதிப்பளித்து நாம் காத்திருக்க வேண்டிய தேவையும் உள்ளது.

பதில்: நாமும் காத்திருக்கிறோம். எல்லோரும் ஏறி விழுந்த குதிரையில் சிறிதரன் சவாரி செய்தால் சரி.

(7) அவர் தனது உரையில் “தமிழர்களின் தேசிய அபிலாசைகளை உலகம் புதிய பரிமாணத்துடன் சிந்திக்க முற்பட்டுள்ளது. நாம் இழந்த ஆத்மாக்கள் இப்பொழுது எமக்கு உத்வேகத்தை தருகிறன. நாம் எந்த நோக்கத்துக்காக எமது உறவுகளின் உயிர்களை இழந்தோமோ அந்த நோக்கங்கள் இன்னும் அழிந்து போகவில்லை. சிங்கள மக்களுக்கு முன்பே நமது தமிழினம் இங்கு வாழ்ந்துள்ளது. நாம் இங்கு பல அடையாளங்களுடன் வாழ்ந்திருக்கிறோம்.

பதில்: இன்று தங்களை சிங்களவர்கள் எனக் கூறுபவர்கள் நாகர்களின் வழித்தோன்றல்களே. இலங்கையில் தமிழர்கள் வாழ்ந்திருக்கிறார்கள். ஆனால் அரசு இருக்கவில்லை. யாழ்ப்பாண இராச்சியம் 13 ஆம் நூற்றாண்டின் முற்பகுதியில் (கிபி 1012) தோன்றியது. கிபி 1619 இல் போர்முனையில் இரண்டாவது சங்கிலி போர்த்துக்கேயரால் தோற்கடிக்கப்பட்டான்.

(8) ஆகவேதான் இழந்த இறைமையை தான் நாம் மீண்டும் பெறப் போராடுகின்றோம். எமது மொழி  இடம்  கலை பண்பாட்டு இவைகள் எமது தமிழ் தேசிய அடையாளத்தைப் பற்றியுள்ளது. நாம் பல சவால்களை சந்தித்து இன்னும் மனிதர்களாக இருக்கிறோம் என்றால் நாம் அறத்தின் மீதும் தர்மத்தின் மீது பற்றுக் கொண்டவர்களாக இருக்கின்றோம்.இலங்கை அரசுக்கு ஒரு செய்தியை கூறுகின்றோம்’ என்று அவர் தனது உரையில் கூறுகின்றார்.

பதில்:  இலங்கைத் தமிழ் அரசுக் கட்சி தனிநாட்டுக்  கோரிக்கையை 1983  பின்னர் கைவிட்டுவிட்டது. இன்று இணைப்பாட்சியை கட்சி கோருகிறது. “ஆகவேதான் இழந்த இறைமையை தான் நாம் மீண்டும் பெற போராடுகின்றோம்” என்று சிறிதரன் சொல்லியிருப்பது கட்சிக் கொள்கைக்கு முரணானது. அது அவரது சொந்தக் கருத்து என்று எடுத்துக் கொண்டிருக்கலாம்.

(9) ஆனால் நாம் ஒன்றை மட்டும் புரிந்து கொள்ள வேண்டும். இலங்கையில் இடம்பெறுவது இனங்களுக்கிடையிலான போட்டி அல்ல. ஆள்கின்றவர்களுக்கும் ஆளப்படுகின்றவர்களும் இடையிலான போட்டி என்பதை எமது புதிய தலை வர் புரிந்து கொள்ள வேண்டும். தமிழரசுக் கட்சியானது பல தடவைகள் ஆள்கினறவர்களாக தமக்குத் தெரிந்த தலைவர்களைக் காப்பாற்றியது. இது கடந்த காலத்திலும் அண்மைக் காலத்திலும் இடம்பெற்ற ;தவறுகள்’ என்பதை  தமிழரசுக் கட்சியினர் புரிந்து கொள்ள வேண்டும். எனவேதான் நாம் குறிப்பிட்டுச் சொல்கின்றோம்.

“தமிழரசுக் கட்சியின் கடந்த அரை நூற்றாண்டுகளுக்கு மேலான தவறுகள் புதிய தலைவரினால் சீர் செய்யப்படவுள்ள வாய்ப்புக்கள் மிக அரிதே!” என்று.

பதில்:  கடந்த அரை நூற்றாண்டில் பெரும் பங்கு  (1983-2009)  வி.புலிகளின் ஆட்சிக் காலம். தவறுகள் இடம்பெற்றிருந்தால் அதற்கு வி.புலிகளே பொறுப்பு. எடுத்துக்காட்டாக 1994 இல் நடந்த நாடாளுமன்றத் தேர்தலை வி.புலிகள் புறக்கணித்ததால் டக்லஸ் தேவானந்தாவின் இபிடிபி கட்சி 10,744 (0.14%) 9 இருக்கைகளைக்  கைப்பற்றி நாடாளுமன்றம் சென்றது. இன்றும் இருக்கிறது. 2005 இல் சனாதிபதி தேர்தலைப் புறக்கணித்ததால் 182,000 மகிந்த இராசபக்ச அரியணை ஏறினார். 2002  டிசெம்பர் 02 இல்  கையெழுத்துப் போடப்பட்ட ஒஸ்லோ பிரகடனத்தை பிரபாகரன் நிராகரித்தார். புலிகளின் காலத்தில் தான் வெலி ஓயா சிங்களக் குடியேற்றத் திட்டம் (1984 – 2009) நிறைவேறியது. இதன் பரப்பளவு குடாநாட்டைப் போல் இரண்டு (2460 சகிமீ)  மடங்கு. இன்று வெலி ஓயா முல்லைத்தீவு மாவட்டத்தில் ஒரு பிரதேசசபை!  இந்தத் தவறுகள் தவறுகளாகப் படவில்லையா? மருமகள் உடைத்தால் பொன்குடம் மாமியார் உடைத்தால் மண்குடமா? (கனடா உதயன் – 02-02-2024)