பொங்கல், புத்தாண்டுத் திருநாளில் எல்லோரது வாழ்விலும் விடியல் பிறக்கட்டும். இன்பம் பொங்கட்டும்!

பொங்கல், புத்தாண்டுத் திருநாளில் எல்லோரது வாழ்விலும்  விடியல் பிறக்கட்டும்.  இன்பம் பொங்கட்டும்!

நக்கீரன்
தலைவர், தமிழ்ப் படைப்பாளிகள் கழகம் 

ஒரு காலத்தில் தமிழ்நாட்டில் தீபாவளிக் கொண்டாட்டத்துக்குக் கொடுக்கப்பட்ட சிறப்பு பொங்கலுக்குக் கொடுக்கப்படவில்லை. செய்தித்தாள்கள்,  கிழமை, மாத சஞ்சிகைள் தீபாவளி மலர் வெளியிடுவதை மட்டும் வழக்கமாகக் கொண்டிருந்தன. பொங்கல் மலர் வெளியிடுவதில்லை.  ஆனால் திராவிட தேசியத்தின் எழுச்சி காரணமாக இன்று பொங்கல் விழா தமிழர்களின் தனிப் பெரும் விழாவாக, பண்பாட்டின் அடையாளமாக பரிணமித்துள்ளது.

பொங்கல் தமிழ் புத்தாண்டு வாழ்த்து - ஏனைய கவிதைகள்

இன்று உலகளாவிய அளவில் பொங்கல் சீரோடும் சிறப்போடும் கொண்டாடப்பட்டு வருகிறது. அதற்கு முக்கிய காரணம் இன்று தமிழ்மொழி, கலை, பண்பாடு ஆகியவற்றின் மீதுள்ள பற்றும் இன உணர்வும் தமிழ்மக்களிடம் மேலோங்கிக் காணப்படுவதே.

தமிழர் திருநாளான பொங்கல்  நாளை 2014 தொடக்கம் விடுமுறை நாளாக  அமெரிக்கா அரசு  அறிவித்தது.   அங்குள்ள 2,500 க்கும் அதிகமான பள்ளிகளுக்கு பொங்கல் விடுமுறை அளிக்கப்படுகிறது.

கதிர் அறுத்து நெல் உதிர்த்து வைக்கோல் போர் செய்து நெல் மூட்டை கட்டிய  நாட்கள் போய்... மீண்டும் #தமிழினம் உழ… | Happy pongal, Happy pongal wishes,  Harvest festival

பொங்கல் விழாவை  அமெரிக்க மாநிலங்களில் ஒன்றான வெர்ஜீனியா சட்ட சபையில்  ஒருமனதாக  அங்கீகரித்துள்ளது. அன்றைய நாள் பள்ளிகளுக்கு விடுமுறை நாளாக அறிவிக்கப்பட்டுள்ளது. ஏற்கனவே நியூ யேர்சி மாநிலத்தில் உள்ள அனைத்து பள்ளிகளுக்கும்  பொங்கல் விடுமுறை அளிக்கப்பட்டு வருகிறது.  

கனடாவில் தை மாதம் தமிழர்களின் மரபுத் திங்களாக மத்திய மற்றும்   ஒன்ராறியோ மாநில அரசுகள் ஒப்புதல் அளித்துள்ளன. பல பொது அமைப்புக்கள் பொங்கல் விழாவினைச் சிறப்பாகக் கொண்டாடுகின்றன.

தை முதல் நாள் அன்று பொங்கல் கொண்டாடுவது போல அந்த நாளை திருவள்ளுவர் பிறந்த நாளாகவும் தமிழ்ப் புத்தாண்டின் தொடக்க நாளாகவும் தமிழர்கள் கொண்டாட வேண்டும். திருவள்ளுவரை மேன்மைப் படுத்துவது போல அவர் பெயரால் அழைக்கப்படும் திருவள்ளுவர்  தொடர் ஆண்டையும் நாம் கடைப்பிடிக்க  வேண்டும்.

1921 ஆம் ஆண்டு சென்னை பச்சையப்பன் கல்லூரியில் மறைமலை அடிகளார் தலைமையில் கூடிய தமிழ் அறிஞர்கள், சான்றோர்கள், புலவர்கள் மூன்று முக்கிய முடிவுகளை அப்போது எடுத்தார்கள்.

1. திருவள்ளுவர் பெயரில் தொடர் ஆண்டைப் பின்பற்றுவது.
2. அதையே தமிழ் ஆண்டு எனக் கொள்வது.
3. திருவள்ளுவர் காலம் கிமு 31 (வழக்கில் உள்ள ஆங்கில ஆண்டுடன் 31 அய்க் கூட்டினால் திருவள்ளுவர் ஆண்டு வரும்)

1971 இல் தமிழ்நாடு அரசு திருவள்ளுவர் ஆண்டு முறையை ஏற்றது. இம்முறையை 1971 முதல் அரசு நாட்குறிப்பிலும் 1972 முதல் அரசிதழிலும் 1981 முதல் அரசின் அனைத்து அலுவல்களிலும் நடைமுறைப்ப்படுத்தப்பட்டு வருகின்றது. 1969 ஆம் ஆண்டு பொங்கல் திருநாளுக்கு அடுத்த நாளை திருவள்ளுவர் நாள் என்று ஏற்று தமிழ்நாடு அரசு விடுமுறை அளித்து ஆணை பிறப்பித்தது. எனவே தை முதல் நாளே தமிழ்ப் புத்தாண்டு ஆகும்.

திருவள்ளுவர் ஆண்டு பிறக்கும் தைத் திங்கள் முதல் நாள்தான் தமிழ்ப் புத்தாண்டு என்பதால் தைத் திங்கள் முதல் நாளையே தமிழ்ப் புத்தாண்டுத் தொடக்கம் என அறிவிக்கும்  சட்டத்தை தமிழக அரசு கடந்த 1.2.2008 அன்று சட்டப்பேரவையில் ஒரு மனதாக நிறைவேற்றியது. அது தொடர்பாக தமிழக அரசு வெளியிட்டுள்ள செய்திக் குறிப்பில் பின்வருமாறு சொல்லப்பட்டிருந்தது.

பொங்கல் திருநாளைத் தமிழர் திருநாளாகக் கொண்டாடி வரும் தமிழ்நாட்டு மக்கள் இனி தமிழ்ப் புத்தாண்டு பிறக்கும் நாளாகவும் இணைத்து இந்நாளை இரட்டிப்பு மகிழ்ச்சியுடன்  வாழை, மா, பலா என முக்கனித் தருக்களை நாட்டி வண்ண வண்ணக் கோலங்கள் இட்டு, வரிசை விளக்குகளால் ஒளியுமிழ் இல்லங்கள் புது எழில் காட்டிட மழலையர், மாணவர், மங்கையர், மகிழ்ச்சியில் தோய்ந்து, புத்தாடை புனைந்து, தமிழ் மானம், தன்மானம் போற்றிப் பாடியும் ஆடியும் சமத்துவ உணர்வு பரப்பியும் தமிழ்ப் புத்தாண்டு இதுவெனத் துள்ளும் மகிழ்ச்சியால் அன்பை அள்ளிப் பொழிவர் என எதிர்பார்த்தனர்.   ஆனால் மே 2011 இல் ஆட்சிக்கு வந்த செல்வி ஜெயலலிதா முன்னைய அரசின் சட்டத்தை திருத்தி சித்திரை முதல் நாளை புத்தாண்டு என அறிவித்துவிட்டார்.

சித்திரை முதல் நாளைப் புத்தாண்டாக தொடர்ந்து கொண்டாடி வரலாம். ஆனால் அது தமிழ்ப் புத்தாண்டு ஆக கொண்டாடக் கூடாது.  இந்துப் புத்தாண்டு (Hindu New Year)  என அதனைக் கொண்டாடலாம்.   அப்படித்தான் அது கொண்டாடப்படுகிறது.

சித்திரை முதல் நாள் (April 14) வேனில் காலத்தின் தொடக்க நாள். அதுவே புத்தாண்டின் தொடக்க நாள் என்று சொல்லப்படுகிறது. ஆனால் வேனில் காலம் புவியின் அச்சு  பின்னோக்கி நகர்வதால் (Precession of Equinoxes) மார்ச்சு 20  அல்லது 21 இல் தொடங்கி விடுகிறது.  இது பஞ்சாங்கம் கணிப்போருக்குத் தெரிவதில்லை. அல்லது தெரிந்தும் கணக்கில் எடுப்பதில்லை.  பருவ காலங்கள் புவிக்கும் ஞாயிறுக்கும் இடையில் உள்ள தொடர்பை வைத்தே நிருணயிக்கப்படுகிறது. பருவ காலங்களுக்கும் கோள்கள் அல்லது நட்சத்திரங்களுக்கும் தொடர்பு இல்லை.

சித்திரை முதல்நாள் ஞாயிறு மீன இராசியில் இருந்து விலகி மேட இராசி, அசுவனி நட்சத்திரத்துக்குள் நுழைகிறது. எனவே வானியல் அடிப்படையில் அதுவே புத்தாண்டு பிறக்கும் நாள் என்று சொல்லப்படுகிறது. அதுவம்  சரியே.

சித்திரைப் புத்தாண்டுக்கு வானியல் அடிப்படை இருப்பது போலவே தைப் புத்தாண்டுக்கும் வானியல் அடிப்படை இருக்கிறது.  தை முதல்நாள் ஞாயிறு தனது தென்திசைப் பயணத்தை (தட்சணாயம்) முடித்துக்கொண்டு வடதிசைப் பயணத்தை (உத்தரயாணம்) மேற்கொள்கிறது.  அதாவது ஞாயிறு தனு இராசியை விட்டு விலகி மகர இராசியில் நுழைகிறது.  எனவே தை முதல் நாளுக்கும் வானியல் அடிப்படை உண்டு என்பது தெளிவாகும்.

பொங்கல் தமிழர்க்கே உரித்தான தனித்துவமான விழாவாகும். தமிழ் மக்கள் சித்திரைப் புத்தாண்டு, தீபாவளி போன்ற பண்டிகைகளைக் கொண்டாடினாலும் பொங்கல் விழாவே சமயம் சாராத பகுத்தறிவுக்கு ஒத்த இனிய அறுவடை விழாவாக விளங்குகிறது. 

கழனி திருத்தி, எருவிட்டு, வரம்பு கட்டி, உழுது, விதைவிதைத்து நெல்மணிக் கதிர்களை அறுவடைசெய்ய உதவியாக இருந்த ஞாயிறுக்கு நன்றி தெரிவிக்கும் நாளாகக் கொண்டாடப் பட்டு வருகிறது. பொங்கலுக்கு அடுத்த நாள் மாட்டுப் பொங்கல். அந்த விழாவும் உழவர்களுக்கு எல்லாவிதத்திலும் உறுதுணையாக இருக்கும் மாடுகளுக்கு நன்றி தெரிவிக்கும் முகமாக மாட்டுப் பொங்கல் அல்லது பட்டிப் பொங்கல் கொண்டாடப்படும். மாடு என்ற சொல்லுக்கு செல்வம் என்ற பொருளும் உண்டு.

தமிழர்கள் புலம்பெயர்ந்து வேறுபட்ட சூழலில் வாழ்ந்தாலும் அவர்களது  பன்முக  பண்பாட்டுக் கோலங்களை வெளிப்படுத்தும் பொங்கல் போன்ற இனிய விழாக்களைத் தவறாது கொண்டாட வேண்டும். அதன் மூலம் தமிழ் மொழி, கலை, பண்பாடு மற்றும் பாரம்பரியங்களை தமிழர்கள் புலத்திலும் பேணிக் காப்பாற்ற முடியும். இப்படியான விழாக்களை தமிழர்கள்  கொண்டாட மறந்தால், அவற்றை அவர்கள் கைவிட்டால் எங்கள் மொழி, கலை, பண்பாடு காலப் போக்கில் அழிந்து போகும் ஆபத்து இருக்கிறது. முன்னைய காலத்தில் புலம்பெயர்ந்த தமிழ் மக்கள் தங்கள் மொழி, கலை, பண்பாட்டை இழந்து தமிழர் என்ற அடையாளத்தையே தொலைத்து இருக்கிறார்கள். அது எங்களுக்கு ஒரு பாடமாக இருக்க வேண்டும்.

உலகின் தொன்மையான ஆறு செம்மொழிகளில் தமிழும் ஒன்று. ஏனையவை இலத்தீன், சீனம், கிரேக்கம், ஹீப்புரூ மற்றும் சமற்கிருதம் ஆகும். தமிழின் சிறப்பினை, அதன் இலக்கிய வளத்தை, உலக அறிஞர்கள் போற்றிப் பேசுகின்றனர்.   ஆனால் தமிழர்களுக்குத் தமிழ்மொழியின் அருமை பெருமை,  சீர் சிறப்புத் தெரியாது இருக்கிறது.

தமிழுக்குத் தொடர்பே இல்லாத உருசிய நாடு தமிழைக் கொண்டாடுகிறது. அங்கிருக்கும் அதிபர் மாளிகையான கிரெம்ளின் மாளிகையின் பெயரை அவர்கள் அழகு தமிழில் எழுதியுள்ளார்கள். முதலாவதாக அவர்கள் தாய்மொழியான உருசிய மொழியிலும் இரண்டாவதாக அண்டைநாட்டு மொழியான சீனத்திலும் மூன்றாவதாக உலகத் தொடர்புமொழி என்ற நோக்கில் ஆங்கிலத்திலும்  நான்காவதாக தமிழிலும் எழுதியிருக்கிறார்கள்.

தமிழைவிட எத்தனையோ உலகமொழிகள் பெரும்பாலான மக்களால் பேசப் படுகின்றன. ஆனால் அவற்றையெல்லாம் விட்டுவிட்டு தமிழ்மொழியில் அதிபர் மாளிகையின் பெயரை எழுதியதற்கு உருசியர்கள்  கூறும் காரணத்தை  தமிழர்கள் சிந்தித்துப் பார்க்க வேண்டும்.

“உலகில் ஆறு மொழிகள்தான் மிகவும் தொன்மையானவை. அவை கிரேக்கம், லத்தீன், எபிரேயம், சீனம், தமிழ், சமற்கிருதம். இந்த ஆறு மொழிகளில் இரண்டு மொழிகள் இன்று வழக்கில் இல்லை. உலகில் உள்ள முக்கிய மொழிகளான 642 மொழிகளிலும் சரியான,  தகுதியான மொழியாக “தமிழ் மொழி”  தென்பட்டது. அந்த மொழியைச் சிறப்பிக்கவே “கிரெம்ளின் மாளிகை” என தமிழில் எழுதினோம்” என்று உருசியர்கள் கூறுகிறார்கள்.

வெளிநாட்டினருக்குத் தமிழின் அருமை பெருமை தெரிந்திருக்கிறது.  தமிழர்களுக்குத்தான் தெரியவில்லை. தமிழில் எழுதுங்கள், தமிழில் பேசுங்கள், தமிழில் வழிபாடு செய்யுங்கள், பிள்ளைகளுக்குத் தூய தமிழ்ப் பெயர் வையுங்கள் என்பதற்கு ஒரு போரட்டமே நடத்த வேண்டியுள்ளது!

தமிழ் வளர வேண்டும் என்றால் தமிழ்மொழி எமது வீட்டு மொழியாக இருக்க வேண்டும். வீட்டில் தமிழைத் தவிர வேறுமொழியில் பேசுவதில்லை என நாம் உறுதி எடுத்துக் கொள்ள வேண்டும்.  இந்தியாவின் புகழ்பெற்ற நேரு குடும்பம் வீட்டில் இந்தியில் மட்டும் உரையாடியது.  எமது அடையாளத்தை உறுதி செய்ய பிறக்கும் குழந்தைகளுக்கு பைந்தமிழில் பெயரிட வேண்டும். திருமணங்கள் திருக்குறள் ஓதி செந்தமிழில் நடைபெற வேண்டும். திருக்கோயில் வழிபாடு வண்டமிழில் இருக்க வேண்டும்.

உங்கள் உறவுகளை தமிழில் அழையுங்கள். அப்பா, அம்மா என்ற அழகு தமிழ் இருக்க டடி, மமி எங்களுக்குத் தேவையில்லை. அங்கிள், ஆன்ரி வேண்டாம். மாமா, மாமி என வண்ணத் தமிழில் கூப்பிடுங்கள். திருநாவுக்கரசர் இறைவனை ‘அப்பன்நீ, அம்மைநீ, அய்யனும்நீ, அன்புடைய மாமனும் மாமியும்நீ’ என்று பாடியிருப்பதை  நோக்குங்கள்  கவனியுங்கள். 

தமிழ் புத்தாண்டு - அனைவருக்கும் இனிய பொங்கல் மற்றும் தமிழர் திருநாள்  நல்வாழ்த்துக்கள். தை பிறந்தால் நல்ல வழி பிறக்க வாழ்த்துக்கள்...! | Facebook

தமிழ்மக்கள் தங்கள் திருக்கோயில் வழிப்பாட்டைச் சொற்றமிழில் செய்ய வேண்டும்.  கடவுளுக்கு மொழிச் சிக்கல் இல்லை. அவருக்கு எல்லா மொழியும் தெரியும். முக்கியமாகத் தமிழ்மொழி தெரியும். சிவனார் ‘அருச்சனை பாட்டேயாகும் ஆதலால் நம்மை மண்மேல் சொற்றமிழ் பாடுக’என்று சுந்தரரைப்  பணித்ததாக சேக்கிழார் பெரிய புராணத்தில் பாடியிருக்கிறார்.  சுந்தரர் ‘இறைவன் தமிழை ஒத்தவன்’ என்றும் நாவுக்கரசர் ‘பண்ணின் இன்மொழி கேட்கும் பரமன்’ என்றும் ‘தமிழோடு இசைபாடல் மறந்தறியேன்’ என்றும் சேக்கிழார் ‘ஞாலமளந்த மேன்மை தெய்வத் தமிழ்’ என்றும்  இறைவனை தமிழாகவே போற்றியிருக்கிறார்கள்.

தேவார காலத்தில்  கோயில்களில் தமிழுக்கு இருந்த மேன்மை இன்று இல்லை. கோயில் விழாக்கள் தொடர்பான அறிவித்தல்கள் பெரும்பாலும் வடமொழி கலந்த தமிழ்க்கிருதத்திலேயே வருகின்றன.

வள்ளலார் ‘எந்தையுனைப் பாடி மகிழ்ந்து இன்புறவே வைத்தருளிச் செந்தமிழை வளர்க்கின்றாய்!’ என்றுபாடி “அருச்சனை பாட்டேயாகும்” என்ற சேக்கிழார் முழக்கத்தை மேலும் கூர்மைப்படுத்தி இருக்கிறார்.  

தமிழ்மக்கள் தங்கள் பிள்ளைகளுக்கு முத்தமிழில் அழகும் இனிமையும்  சொற்சுவையும் பொருட்சுவையும் ஓசைநயமும் நிறைந்த தனித் தமிழ்ப் பெயர்களை சூட்ட வேண்டும். இப்படிச் செய்வது தமிழ்மக்கள் அன்னைத் தமிழுக்குச் செய்யக்கூடிய குறைந்தளவு தொண்டாகும். தமிழ்க் குழந்தைகளின் பெயர் பெரும்பாலும் வடமொழியாய் இருப்பதற்கு சோதிடம், சாதகம், நாள், நட்சத்திரம், எண் கணியம் போன்ற மூடநம்பிக்கைகளை நம்புவது காரணமாகும்.

தமிழனைத் தமிழன் என அடையாளங்காட்ட முடியாத பெயர்களை குழந்தைகளுக்குச் சூட்டுவது தமிழுக்கு பெற்றோர்கள் தெரிந்தே செய்யும் மிகப்பிரிய இரண்டகமாகும்.  அழகானதென எண்ணிச் சூடிக்கொள்ளும் வடமொழிப் பெயர்களின் இழிபொருள்  பெற்றோர்களுக்குத் தெரிவதில்லை. 

Thiruvalluvar | vikadakavi

தமிழ்த் தேசியம் பற்றி வாய்ப்பறை கொட்டுகிறவர்களும் எழுதுகிறவர்களும் தமிழ்மொழி வாழ்த்துப் பாடுகிறவர்களும் தமிழை வளர்ப்பதில்லை. போற்றுவது இல்லை. தமிழ்ப் பெற்றோர்கள் புதுமை என்ற போர்வையில் தங்கள் பிள்ளைகளுக்கு அறம்புறம் சிதம்பரமாகப் பெயர் வைக்கிறார்கள். அவற்றை எங்கிருந்து பொறுக்குகிறார்களோ யாம் அறியோம். சமற்கிருத்த எழுத்துக்களான ஹ,ஸ்ரீ, ஜ,ஸ,ஷ  போன்றவற்றில் பெற்றோர்களுக்கு அளவுகடந்த மோகம் இருப்பதைக் காணக் கூடியதாக இருக்கிறது.

இந்த ஆண்டு (வள்ளுவர் ஆண்டு 2052) யாழ்ப்பாணத்தில் பள்ளி மாணவர்களுக்கு இடையில் ஒரு கவிதைப் போட்டி நடந்தது. அதில் பரிசு பெற்றவர்களின் பெயர்கள் பின்வருமாறு இருந்தன:

அபிநயா, பிரதாயினி, நிறோசனா, கரஜன், டிலுக்கா, சத்யசனாதன், நிசாந்தினி,  பவிசாயினி, அபிவர்மன், லோஜினி, ஸ்ணுகா,தர்சினி, சோபிகா, நிலுக்ஷனா, ரானுகா, பாரதப்பிரியா, சுதர்ணியா, ஸ்ரீலங்கரூபன் ஜஸ்மிகா, ரானுகா, அபிவர்ணா, சரணியா, புஸ்பராசா, சிந்துஜா, சக்தீனா, யகிர்தா, நருமதா, கோஜியா நவரூபன், தவேதன், மாதுரி, அஸவினா,  ஹிருத்திக், மேருயா, பானுஜன், பிருந்தாஜினி, சாருஜா, ஹிசோன்.

டிலுக்கா, கரஜன், நிலுஷனா, சக்தீனா என்றால் என்ன பொருள்?

பெற்றோர்களுக்குத் தமிழ் எது வடமொழி எது என்ற குழப்பம் இருக்கிறது. இதனைத் தீர்ப்பதற்கு ஒரு இலகுவான வழி இருக்கிறது. பெயர்களில் ஜ,ஸ,ஷ,ஹ, ஸ்ரீ போன்ற கிரந்த எழுத்துக்கள் இருந்தால் அவை வடமொழிப் பெயர்களாகவே இருக்கும். மேலும் தமிழில் சொற்களுக்கு முன்வராத ட, ர, ல, ங, ண, ழ, ள, ற, ன எழுத்தில் தொடங்கும் பெயர்கள் தமிழ்ச் சொற்களாக இருக்க முடியாது.

தமிழ்மொழி வெறும் மொழி மட்டுமல்ல. அஃது ஓர் பழம் பெரும் இனத்தின் பல்லாயிரம் ஆண்டுப் பட்டறிவுப் பெட்டகம். கருவூலம். மூவாத் தமிழில் அழகும் இனிமையும்  பொருளும் நிறைந்த பெயர்கள் ஏராளமாகவும் தாராளமாகவும் இருக்கின்றன.

அரசி, அருளரசி, அன்பரசி, தமிழரசி, கலையரசி, கலைமகள், திருமகள், நிலமகள், நாமகள், பூமகள், வள்ளி, கோதை, நிலா, அரசன், மாறன், அழகன், முருகன், கண்ணன் எனச் சின்னக் குழந்தைகளுக்கு நல்ல நல்ல வண்ணப் பெயர்கள் இருக்கின்றன.

எங்கள் மொழியையும் பண்பாட்டையும் கட்டிக் காத்து அடுத்த தலைமுறைக்குக் கையளிக்கும் பொறுப்பு எங்கள் எல்லோருக்கும் உண்டு. தமிழில் என்ன இருக்கிறது? தமிழ் சோறு போடுமா?  என்று கேட்பவர்களும் இருக்கிறார்கள். சோற்றுத் தமிழர்கள் சோற்று மொழியைத் தேடிக் கொள்ளட்டும். சோறு போடும் மொழியை மட்டும் கற்றவன் நன்றாகச் சோறு உண்ணலாம். ஆனால் அவன் யார்? அவன் அடையாளம் என்ன? அவன் பண்பாடு எது? மரபு யாது?

நடந்தவை நடந்தவையாக இருக்கட்டும். நடப்பவை நல்லவையாக நடக்கட்டும், பிறக்கும் புத்தாண்டில்  அல்லவை தேய்ந்து  நல்லவை நடக்க வேண்டும்.  அனைவரது வாழ்விலும் அன்பும் மகிழ்ச்சியும் குறைவில்லா செல்வமும் பெருக வேண்டும். எல்லோரது வாழ்விலும்  விடியல் பிறக்க வேண்டும்.  இன்பம் பொங்க வேண்டும் என்ற  நம்பிக்கையோடு பொங்கல் திருநாளில்  திருவள்ளுவராண்டு 2052 இல்  காலடி எடுத்து வைப்போம். 


 

தைப்பொங்கல் என்பது தமிழர்களுக்களுக்கே சொந்தமான திருநாள். தமிழர்கள் சிறப்பாகக் கொண்டாடப்படும் ஒரு தனிப்பெரும் பண்பாட்டுத் திருநாள்.

தை மாதப் பிறப்புத் தமிழர்களால் தைப்பொங்கல்  விழாவாகக் கொண்டாடப்படுகிறது. 

தைப் பொங்கல் தமிழர் திருநாளாக, தமிழர்களின் பண்பாட்டுக் கோலங்களின் குறியீடாக உலகம் வாழ் தமிழர்களால் தமிழ்நாடு, இலங்கை, மலேசியா, சிங்கப்பூர், ஐரோப்பிய நாடுகள், வட அமெரிக்கா, தென் ஆப்பிரிக்கா, மொரிசியஸ்  எனத்  தமிழ் கூறும் நல்லுகம் எங்கும் சீரோடும் சிறப்போடும்  கொண்டாடப்படுகிறது.

காடு வெட்டி, களனி திருத்தி, உழுது, வரப்புக் கட்டி, எரு இட்டு, நெல்விதைத்து, களை பிடுங்கி, நெற்பயிர்கள் காய்த்துக் குலுங்கும் போது அதனை அறுவடை செய்து, குத்தி அரிசியாக்கி புதுப்பானையில் பொங்கி  இயற்கைத் தெய்வமாகக் கருதப்படும் சூரியனுக்கும்  மற்ற உயிர்களுக்கும்  படைத்து  நன்றி செலுத்தும் நாளே பொங்கல் நாளாகும். இந்த நாள் முழுக்க முழுக்க உழவர்கள் நாளாகும். அது ஆண்டு தோறும் தை முதல் நாள் அன்று வருகிறது.

தமிழர்கள் உட்பட பெரும்பாலான மக்களின் உணவுத் தேவைகளை நெல்லே அதிகம் பூர்த்தி செய்கிறது. இதற்கு ஒளவையார் காலத்துப் பாடல்களே சான்று. “வரப்புயர நீருயரும் நீருயர நெல்லுயரும்.. நெல்லுயரக் கோன் உயர்வான்” என்று அன்றே ஒளவை உழவுத்தொழிலின் முக்கியத்துவத்தையும் செல்வாக்கையும் எடுத்துச் சொல்லிவிட்டார்.

தை மாதத்தின் சிறப்பை எமது பண்டைய நூல்கள் சிறப்பித்துக் கூறுகின்றன.

தை முதல்நாளே சூரியன் தனது தென்திசைப் பயணத்தை முடித்துக் கொண்டு வட திசைப் பயணத்தை மேற்கொள்கிறான். இதனை உத்தராயணம் என்பார்கள். அந்த உத்தராயணத்தின் தொடக்கம்தான் தை  முதல் நாள்.

இந்த நாளில்தான்  சூரியன் தனது பயணித்தில்  12 இராசிகளைக் கொண்ட இராசிச் சக்கரத்தில் உள்ள  மகர இராசிக்குள் நுழைகிறது.   அடுத்த ஆறுமாதமும் பகல் பொழுது கூடிக் கொண்டே போகும்.  எனவே தை முதல் நாள் கொண்டாடப்படும் தைப்பொங்கல் விழாவுக்கு  வானியல்அடிப்படையும்  இருக்கிறது தெளிவாகும்.

பொங்கல் பண்டிகையின் இன்னொரு சிறப்பு, தமிழ் மாதங்களில் தலை மாதமான தை மாதத்தின் பிறப்பு. தைத் திங்களில்தொடங்கும் எதுவும் தழைத்தோங்கும் என்ற நம்பிக்கை தமிழர்களின் மனதில் காலம் காலமாக வேரூன்றி விட்ட ஒன்றாகும். தைப்பிறந்தால் வழி பிறக்கும் என்ற பழமொழியே அதற்கு நல்ல சான்று.

தைந்நீராடல் சங்ககால நீர் விளையாட்டுகளில் ஒன்று. தை மாதம்  தமிழ்நாட்டுப் பருவகாலத்தில் முன்பனிக்காலம். இக்காலத்தில் விடியற்காலத்தில் ஆற்றுநீரும், குளத்து நீரும் வெதுவெதுப்பாக இருக்கும். மாலையில் குளுமையாக இருக்கும். சங்ககால மகளிர் இந்த வெதுவெதுப்பில் நீராடி மகிழ்ந்தனர். இதனை இலக்கியங்கள் தைநீராடல் எனக் குறிப்பிடுகின்றன.

தமிழர்கள் ஒரு ஆண்டினை ஆறு காலமாய் பிரித்திருந்தார்கள்.  அவை முன்பனிக் காலம்(மார்கழி, தை) பின்பனிக் காலம்(மாசி பங்குனி) இளவேனிற் காலம் (சித்திரை, வைகாசி),முதுவேனில் காலம் (ஆனி, ஆடி) கார்  காலம் (ஆவணி, புரட்டாதி )கூதிர்  காலம் (ஐப்பசி, கார்த்திகை)ஆகும். இந்த ஒவ்வொரு பருவ காலமும் இரண்டு மாதங்களைக் கொண்டதாகும்.

கனடாவில் கூட 1921 ஆம் தொடக்கம் Thanks giving நாள் ஒக்தோபர் மாதம் இரண்டாம் திங்கட்கிழமையில்  கொண்டாடப் படுகிறது. இதுவும் பொங்கல் நாள் போலவே உழவர்களுக்கு உரிய அறுவடைப் பெருநாளாகும். அமெரிக்காவில் இதே நாளை நொவெம்பர் மாதத்தில் வரும் 4 ஆவது வியாழக் கிழமை  அன்று கொண்டாடுகிறார்கள்.

ஆடி மாதத்தில் தேடி விதைத்த பயிர்களின் விளைச்சலை அறுவடை செய்து பயன் அடையும் பருவமே தை மாதம் ஆகும். அந்த அறுவடையில் கிடைத்த நெல்லின் புத்தரிசியைச் சருக்கரை, பால், நெய் சேர்த்துப் புதுப் பானையிலிட்டுப் புத்தடுப்பில் கொதிக்க வைத்துப் பொங்கல் சோறாக்கிக் சூரியனுக்கும் மாட்டுக்கும் படைத்து உண்டு மகிழும் விழாவே பொங்கல் விழாவாகும்.

பொங்கல் விழா, மக்களால் இயல்பாகக் கொண்டாடப்படுகிறது. உழைக்கும் தமிழ் மக்கள் தாமே கண்டுணர்ந்து, தமது உழைப்பிற்கு உதவிய இயற்கைக்கும், தம்மோடு சேர்ந்து உழைத்த கால்நடைகளுக்கும், தமது நன்றியையும் மகிழ்ச்சியையும் தெரிவிக்கும் விழா. உழவர்கள் மழையின் உதவியால் புரட்டாதி  மாதம் முதல்  விளைந்த நெற்கதிர்கள் தை மாதம் முற்றும் போது அதனை அரிந்து வீட்டிற்குக் கொண்டு வந்து அரிசியாக்கிப் பொங்கிப் படைக்கும் நாளே தைப்பொங்கல்.

தமிழர்கள் கொண்டாடும் பொங்கலுக்குத் தனிச்  சிறப்பு இருக்கிறது. பொங்கல் சமயம் சாராத ஒரு விழாவாகும். இந்த விழாவின் நடைமுறையைப் பார்த்தால், சமயங்கள்  சமயங்கள் தமிழகத்திலும் ஈழத்திலும்  நிலைகொள்ளுவதற்கு முன்னாலிருந்தே, இனக்குழு வழிபாடுகள் நிலவிய போதே, இந்த விழாக் கொண்டாடப் பட்டு வருவது தெரிய வரும்.  தமிழர்கள் சமய பேதமின்றி அதனைக் கொண்டாடலாம். பொங்கல் விழா தமிழரின் தேசிய விழாவாக இன்று பரிணமித்துள்ளது என்று கூடக்  கூறிக்கொள்ளலாம். 

தை மாதம் பிறப்பதற்கு முன்னரே பொங்கலுக்குத் தேவையான பொருள்களை ஆயத்தப்படுத்திக் கொள்வர். பொங்கல்  பொங்குவதற்கு புதுப்பானை, மஞ்சள் செடி, பூக்கள், மாவிலை தோரணம் மக்கள் வாங்குவர்.

பொங்கல் நாளன்று முற்றத்தில் கோலம் இட்டு அதன் ஒரு மூலையில் அடுப்பு வைத்து அதன் மேல்  பொங்கல் பானையை வைத்துப் பொங்குவர். சூட்டில் பால் பொங்கி வழியும் போது அரிசியை இட்டு  அதோடு  சர்க்கரை, முந்திரி, பருப்பு, ஏலம், கற்கண்டு சேர்த்துப் பொங்குவர்.

புலம் பெயர்ந்து வாழும் நாங்கள் ஊரில் நடப்பது  போல் முற்றத்தில் அடுப்பு வைத்து நெருப்பு மூட்டி பொங்க முடியாவிட்டாலும் சமயலறையில் புதுப் பாத்திரத்தில் பொங்கலாம்.

இன்று உலகளாவிய அளவில் தமிழ்மொழி, கலை, பண்பாடு ஆகியவற்றின் மீதுள்ள பற்றும் தமிழின உணர்வும் தமிழ்மக்களிடம் மேலோங்கிக் காணப்படுகிறது.  தமிழர் திருநாளான பொங்கல்  நாளை 2014 தொடக்கம்  அமெரிக்கா விடுமுறை நாளாக  அமெரிக்கா அரசு  அறிவித்துள்ளது.   அங்குள்ள 2,500-க்கும் அதிகமான பள்ளிகளுக்கு பொங்கல் விடுமுறை அளிக்கப்படுகிறது.

பொங்கல் விழாவை  அமெரிக்க மாநிலங்களில் ஒன்றான வெர்ஜீனியா சட்ட சபை  ஒருமனதாக  அங்கீகரித்துள்ளது. அன்றைய நாள் பள்ளிகளுக்கு விடுமுறை நாளாக அறிவிக்கப்பட்டுள்ளது. ஏற்கனவே நியூ யேர்சி மாநிலத்தில் உள்ள அனைத்து பள்ளிகளுக்கும்  பொங்கல் விடுமுறை அளிக்கப்பட்டு வருகிறது.  

கனடாவில் தை மாதம் தமிழர்களின் மரபுத் திங்களாக மத்திய மற்றும்   ஒன்ராறியோ மாநில அரசுகள் ஒப்புதல் அளித்துள்ளன. பல பொது அமைப்புக்கள் பொங்கல் விழாவினை ஆடல், பாடல், பேச்சுப் போட்டி போன்ற நிகழ்ச்சியோடு கோலாகலமாகக் கொண்டாடி மகிழ்கின்றன. 

நாம் புலம்பெயர்ந்த மண்ணில் வாழ்ந்தாலும் எமது மொழி, கலை, பண்பாடு போன்றவற்றை மறவாது நாம் கட்டிக் காத்துக் கொண்டாடி வர வேண்டும். அடுத்த சந்ததிக்கும் அதனை நாம் கையளிக்க வேண்டும். இந்தப்  பொங்கல் திருநாளில் –

எல்லோரது வாழ்விலும்  விடியல் பிறக்கட்டும். 
இன்பம் பொங்கட்டும்!
எண்ணிய முடிதல் வேண்டும்
நல்லவே எண்ணல் வேண்டும்
திண்ணிய நெஞ்சம் வேண்டும்
தெறிந்தநல் .அறிவு வேண்டும்
பண்ணிய பாவ மெல்லாம்
பரிதி முன் பனியே போல அகல வேண்டும்
இன்பமே சூழ்க எல்லோரும் வாழ்க!

About editor 2228 Articles
Writer and Journalist living in Canada since 1987. Tamil activist.

Be the first to comment

Leave a Reply