நமது பயன்பாட்டில் தமிழ்

(1)

அண்மையில் என்னுடைய உறவினர் வீட்டுக்குச் சென்றிருந்தேன்.

மதிய உணவுவேளையின் போது உறவினரின் மகன், "அம்மா 'சோறு' போடுங்க!!" என்றான். அதற்கு உறவினரோ, "சோறுன்னு சொல்லாதே. சாதம்னு சொல்லு!" என்றார்.

இதைக் கேட்டுக் கொண்டிருந்த எனக்கு வியப்பாக இருந்தது.

"சாதம்" என்பது தூய தமிழ்ச் சொல் கிடையாது என்பது தான் வியப்புக்குக் காரணம்.

"சோறு" என்பதே தூய தமிழ்ச் சொல். "சாதம்" என்பது வடசொல் என்பது நமக்குத் தெரியுமா?

ஆனால், நமது பயன்பாட்டில் "சோறு" என்பது தரக் குறைவான சொல்!?

சுத்தம் - துப்புரவு இந்த இரண்டு சொற்களில் எது தூய தமிழ்ச் சொல்?

துப்புரவு தான் தூய தமிழ்ச் சொல். ஆனால் நாம், "துப்புரவு" என்ற சொல்லை அதிகமாக பயன்படுத்துவது, துப்புரவுத் தொழிலைக் குறிப்பிடுவதற்குத் தான். இப்படி, நமக்கு தெரியாமலேயே தூய தமிழ்ச் சொற்களுக்கு நாம் இரண்டாம் இடத்தையே தருகிறோம் என்பது சிறிது யோசிக்க வேண்டிய ஒன்று.

ஆசிர்வாதம் - வாழ்த்து

வாழ்த்து என்பதன் வடசொல்லே ஆசிர்வாதம். ஆனால் நமது பயன்பாட்டில், "பெரியோரின் காலில் விழுந்து வாழ்த்து வாங்க வேண்டும்" என்று கூறுவது மிகவும் அரிதே. அந்த இடத்தில், "ஆசிர்வாதம்" என்ற வார்த்தையையே பயன்படுத்துகிறோம்.

இது போல, நாம் பயன்படுத்தும் பல சொற்கள் வடசொற்களே. கீழே சில எடுத்துக்காட்டுகள் (உதாரணம் என்பது வடசொல்)

வடசொல்      - தமிழ்ச்சொல்

அகங்காரம்     -   செருக்கு
அகதி          -   ஆதரவற்றவர்
அகிம்சை      -    ஊறு செய்யாமை
அங்கத்தினர்    -   உறுப்பினர்
அங்கீகாரம்     -   ஒப்புதல்
அசுத்தம்       -   துப்புரவின்மை
அதிகாரி       -   உயர் அலுவலர்
அநீதி         -   முறையற்றது
அபயம்       -    அடைக்கலம்
அபிவிருத்தி   -   பெருவளர்ச்சி
அபிஷேகம்    -   திருமுழுக்கு
அபிப்பிராயம்  -   உட்கருத்து

"ஞாபகம் வருதே! ஞாபகம் வருதே!" என்று நமது நினைவுக் குறிப்புகளை எழுதுவது இன்று நம் மத்தியில் அதிகமாகக் காணப்படுகிறது. அதற்கு நாம் (என்னையும் சேர்த்து) கொடுக்கும் பெயர் "அனுபவக் குறிப்புகள்".

சின்ன வயதில் நாம் ஏதாவது குறும்பு செய்தோம் என்றால், வீட்டில் நம்மிடம் கூறுவது, "அத எடுக்காதன்னு சொன்னா கேட்க மாட்டீங்கற... உனக்கு பட்டாத்தான் தெரியும்!!". அதே போல, ஒருவர் வாழ்க்கையில் அடிபட்டு முன்னேறி இருந்தால், நாம் கூறுவது, "அவருக்கு பட்டறிவு அதிகம்," என்பது தான்.

"பட்டறிவு" என்ற தமிழ்ச் சொல்லின் வடசொல்லே "அனுபவம்".

நல்லதோ கெட்டதோ "பட்டால்" தானே நமக்கு மறக்க முடியாத நினைவாகிறது? ஆனால் இன்றைய பயன்பாட்டில் "பட்டறிவு" என்ற சொல்லையும் "அனுபவம்" என்ற சொல்லையும் வெவ்வேறு பொருளுக்குப் பயன்படுத்துகிறோம்.

வட இந்தியப் பெயர்களில், "அனுபவ்" என்ற சொல் வரும் போது, "பரவாயில்லையே தமிழ்ச் சொல்லை அங்கேயும் பயன்படுத்துகிறார்கள்" என்று மகிழ்ச்சி அடைந்ததுண்டு. ஆனால், அது எனது அறியாமை என்பது புரிகிறது.

("ஞாபகம்" என்பதே "நினைவு" என்பதன் வடசொல்லே!)

வட மாநிலங்களில் "கார்யாலயி" என்ற வார்த்தை பெரும்பாலான அலுவகங்களில் பார்க்க முடியும். அதையே நாம் "காரியம்" என்ற சொல்லால் பயன்படுத்துகிறோம்.

காரியம்            - செயல்
காரியம் என்ற வடசொல்லுக்கு நிகரான தமிழ்ச்சொல் 'செயல்'.
காரியாலயம்       - செயலகம்.
காரியதரிசி        - செயலர், செயலாளர்.

இங்கே, "காரியவாதி" என்ற சொல் "தனது செயலில் மட்டும் குறியாக இருப்பவரை" குறிக்கும்படி பயன்படுத்தும் வழக்கம் எப்படி வந்தது?

இலட்சணம் - அழகு

உனக்கு எப்படி பெண் தேட வேண்டும் என்ற கேள்வி வரும் போது, "அழகா, கண்ணுக்கு இலட்சணமா இருக்க வேண்டும்" என்று நாம் கூறுவது வழக்கம். இதனை, "அழகா, கண்ணுக்கு "அழகா" இருக்க வேண்டும்" என்று கூறுவதாகவே பொருள் கொள்ள வேண்டும்.

ஏனென்றால், இலட்சணம் என்ற வடசொல்லின் தமிழ்ச்சொல் அழகு.

மேலும் "உத்தியோகம் புருஷ இலட்சணம்" என்ற வாக்கியத்தை தூய தமிழில், "நல்ல அலுவல் ஆண்மகனுக்கு அழகு!" என்று எழுதலாம்.

அர்ச்சணை - மலரிட்டு ஓதுதல்

இன்று பெரும்பாலான கோயில்களில் "இங்கு தமிழில் அர்ச்சணை செய்யப்படும்" என்று எழுதி இருப்பதைக் காண்கிறோம்.

அர்ச்சணை என்பது மலரிட்டு ஓதுதல் என்பதன் வடசொல். இதே வரிசையில் கோயில்களில் பயன்படுத்தும் சில வடசொற்களுக்கான தமிழ்ச்சொல் கீழே...

வடசொல்            - தமிழ்ச்சொல்

அனுக்கிரகம்          - அருள் செய்தல்
ஆராதனை            - வழிபாடு
உற்சவம்             - விழா
கும்பாபிஷேகம்       - குடமுழுக்கு
கோத்திரம்            - குடி
சந்தியாவந்தனம்      - வேளை வழிபாடு
சரணம்              - அடைக்கலம்
சிவமதம்            - சிவநெறி
பஜனை              - கூட்டுப்பாடல் வழிபாடு
பிரசாதம்            - திருப்பொருள்
பிரகாரம்            - திருச்சுற்று
(அங்கப்) பிரதட்சனம்  - வலம் வருதல்
பிரார்த்தனை        - நேர்த்திக்கடன்
மந்திரம்            - மறைமொழி
மார்க்கம்          - நெறி, வழி
விக்கிரகம்         - திருவுருவம்
யாத்திரை         - திருச்செலவு.
க்ஷேத்திரங்கள்     - திருப்பதிகள்

இந்த சொற்களை நாம் பயன்படுத்துகிறோமோ இல்லையோ, புதிதாக நமக்குத் தெரிந்தால் நல்லது தானே!

அபூர்வம், அவசரம், அவகாசம், அவசியம் - இதில் எது தூய தமிழ்ச்சொல்..? அடுத்தக் கட்டுரையில் அலசுவோம்!

நமது பயன்பாட்டில் தமிழ்

(2)

இந்தி மற்றும் இதர இந்திய மொழிகளில் இருப்பது போன்ற எழுத்துக்கள் தமிழ் மொழியில் இல்லையே என்று நமக்கு ஓர் ஐயம் (சந்தேகம் - வடசொல்) வருவதுண்டு.

அபூர்வம், அவகாசம், அவசரம், அவசியம் - இதில் எது தூய தமிழ்ச்சொல் எதுவுமே இல்லை.

அபூர்வம் - அருமை

அபூர்வம் என்ற வடசொல்லுக்கு நிகரான தமிழ்ச்சொல் அருமை. ஆனால், மிகவும் வியக்கத்தக்கதாக இருந்தால் 'அபூர்வம்' என்றும், நன்றாக இருந்தால் 'அருமை' என்ற சொல்லும் பயன்பாட்டில் உள்ளது.

அவசரம் - விரைவு

சிகிச்சை - மருத்துவமுறை

'சிகிச்சை' என்ற வடசொல்லின் தமிழ்ச்சொல் தான் 'மருத்துவ முறை' என்று தெரிந்த பிறகு 'இந்த மருத்துவமனையில் சிறப்பாக மருத்துவ சிகிச்சை அளிக்கப்படும்', என்ற விளம்பரத்தை நாம் எப்படி நோக்குவோம்?

திருப்தி - உள நிறைவு, மன நிறைவு

Biography : Life writing - Bio - (Life), Graphy - ( Writing )

இது போல நமது பயன்பாட்டில் உள்ள சொற்களைப் பிரித்து உரைக்க சொன்னால் நம்மால் முடியுமா?

'திருப்தி' என்ற வடசொல்லை 'உள நிறைவு' என்ற தமிழ்ச்சொல்லால் குறிப்பிடும் போது மிக எளிதாக (சாதாரண) விளக்கமுடியுமே!!

நமது பயன்பாட்டில் உள்ள பிற வடசொற்களும் அதற்கான தமிழ்ச்சொற்களும் கீழே...

வடசொல் - தமிழ்ச்சொல்

அபூர்வம்        - அருமை
அவகாசம்       - ஓய்வு
அவசரம்        - விரைவு
அவசியம்       - தேவை
அவயவம்       - உறுப்பு
ஆகாயம்        - வானம்
ஆபத்து         - துன்பம்
ஆன்மா          - உயிர்
இராகம்          - பண்
இரத்தம்         - குருதி
இலக்கம்         - எண்
உபத்திரவம்      - வேதனை
ஐக்கியம்         - ஒற்றுமை
கஷ்டம          - தொல்லை
கல்யாணம்       - திருமணம்
கிரயம்          - விலை
குதூகலம்       - எக்களிப்பு
கோஷ்டி        - குழாம்
சக்தி           - ஆற்றல்
சகஜம்         - வழக்கம்
சக்கரவர்த்தி    - பேரரசன்
சந்தேகம்      - ஐயம்
சபதம்         - சூள்
சந்தோஷம்    - மகிழ்ச்சி
சமீபம்        - அண்மை
சச்சிதானந்தம் - மெய்யறிவின்பம்
சத்தியாக்கிரகம் - அறப்போராட்டம்
சந்ததி        - வழித்தோன்றல்
சிகிச்சை      - மருத்துவமுறை
சந்தர்ப்பம்    - வாய்ப்பு
சம்பிரதாயம்  - தொன்மரபு
சாபம்        - கெடுமொழி
சாதாரண     - எளிதான
சாட்சி        - சான்று
சிங்காசனம்   - அரியணை
சிநேகம்      - நட்பு
சீதோஷ்ணம் - தட்பவெப்பம்
சுதந்திரம்    - விடுதலை
சுயராஜ்யம்  - தன்னாட்சி
சுபாவம்     - இயல்பு
சேவ        - தொண்டு
சேஷ்டை    - குறும்பு
சௌகரியம்  - வசதி
தற்காலிக வேலை - நிலையிலா வேலை
தாகம்            - வேட்கை
தேதி             - நாள்
திருப்தி           - உள நிறைவு
நஷ்டம          - இழப்பு
நிபுணர்          - வல்லுநர்
நியாயஸ்தலம   - வழக்கு மன்றம்
நீதி             - நன்னெறி
பகிரங்கம்        - வெளிப்படை
பரிகாசம்         - நகையாடல்
பத்தினி          - கற்பணங்கு
பத்திரிக்கை      - இதழ்
பரீட்சை         - தேர்வு
பந்துக்கள்        - உறவினர்கள்
பாரம்           - சுமை
பாஷை         - மொழி
பிரசாரம்        - பரப்புவேலை, பரப்புரை
பூர்வம்          - முந்திய
மரணம்         - சாவு, இறப்பு
மாமிசம்        - இறைச்சி
மிருகம்         - விலங்கு
முகூர்த்தம்     - நல்வேளை
மோசம        - கேடு
யந்திரம்        - பொறி
யாகம்         - வேள்வி
யுத்தம்         - போர்
ரகசியம்        - மறைபொருள், குட்டு, பூடகம்
ருசி            - சுவை
லாபம்          - மிகை ஊதியம்
வருஷம்        - ஆண்டு
வாகனம்        - ஊர்தி
வாதம்          - சொற்போர், சொல்லாடல்
வாந்தி பேதி     - கக்கல் கழிச்சல்
வாலிபர்         - இளைஞர்
விஷயம்        - பொருள், செய்தி
விபத்து         - துன்ப நிகழ்ச்சி
விவாகம்        - திருமணம்
வீரம்           - மறம்
வேகம்         - விரைவு
ஜனங்கள்       - மக்கள்
ஜயம்          - வெற்றி
ஜாக்கிரதையாக - விழிப்பாக
ஜென்மம்       - பிறவி
ஸ்தாபனம்      - நிலையம், அமைப்பு

இந்த தமிழ்ச்சொற்களை முழுதாக பேச்சிலும் எழுத்திலும் பயன்படுத்த முடியாவிட்டலும், சிறிது முயற்சி செய்தாலும் நல்லது தானே!

வீட்டில் கொண்டாடப்படுவது பண்டிகையா? விழாவா?

பசும் பால், பசுப் பால் - இதன் வேறுபாடு என்ன?

வடசொல் மட்டுமல்ல போர்த்துகீசிய, அரபிய சொற்களும் நமது பயன்பாட்டில் உள்ளது என்பது தெரியுமா?

அடுத்தக் கட்டுரையில் காண்போம்.

முந்தைய அத்தியாயம் : நமது பயன்பாட்டில் தமிழ் - 1

நமது பயன்பாட்டில் தமிழ்

(3)

*********************************************************************

*********************************************************************

*********************************************************************

தொழில்நுட்பத் துறை இளைஞர்களுக்கு கூட இணையதளங்களில் பல்வேறு வலைப்பதிவுகள் மூலமாக தமிழிலேயே எழுதும் ஆர்வம் மிகுதியாகியிருப்பது மகிழ்வுக்குரியது.

ஆனால், நம்மால் ஐயமில்லாமல் எழுத முடிகிறதா?

"ல,ழ,ள", "ண,ந,ன", "ர,ற" போன்ற எழுத்துக்களை பயன்படுத்துவதை எடுத்துக்கொள்வோம்.

300 ரூபாயை எப்படிக் குறிப்பிடுவீர்கள்? முன்னூறு என்றா? அல்லது முந்நூறு என்றா?

முன்னூறு - முன்னே வரும் நூறையும், முந்நூறு - மூன்று நூறையும் குறிப்பிடுகிறது.

அதே போல "முன்னாள் (முன் ஒரு நாள் ) இதைப் போன்று ஒரு நிகழ்ச்சி நடந்தது" என்பதற்கும் "முந்நாள் (மூன்று நாள்) இதைப் போன்று ஒரு நிகழ்ச்சி நடந்தது" என்பதற்கும் பெரிய வேறுபாடு உள்ளதே!

*******************************************************

பெரும்பாலானோர்க்கு எண்களைக் குறிப்பிடுவதில் ஐயம் வரத்தான் செய்கிறது.

எண்பது - 80
என்பது - என்று சொல்வது

எண்ணை - Number
எண்ணெய் - தேங்காய் எண்ணெய் ( வெண்ணெய் என்று குறிப்பிடுவது சரியா? )

************************************************************

இதர னகர ணகர நகர வேறுபாடுகள் பற்றி கீழே தெரிந்து கொள்வோம்...

அன்னாள் - அவள்
அந்நாள் - அந்த நாள்

இன்னார் - இத்தகையர் (இன்னார் இனியார் என்று எழுதுவோமே)
இந்நார் - இந்த நார் ( இந்நார் இனியார் என்று எழுதினால் எப்படி இருக்கும்?)

************************************************************

தமிழக அரசியலில் "சுவரொட்டிகளுக்கு" ஒரு தனி இடம் இருக்கத்தான் செய்கிறது. சுவரொட்டிகளில், நம் கண்ணில் படுவனவற்றுள் "இவண் - செயலாளர் " என்பனவும் ஒன்று. சில சமயம் தவறாக "இவன் - கொ.ப.செ" என்று அச்சிடுவதும் நடக்கத்தான் செய்கிறது.

இவன், இவண் என்ன வேறுபாடு?

இவன் - இங்கே இருப்பவனை குறிப்பிடுவது
இவண் - இங்ஙணம் (மாற்றி எழுதினால் என்ன ஆகும்?)

ஈந்தாள் - கொடுத்தாள்
ஈன்றால் - பெற்றெடுத்தாள்

உண்ணல் - புசித்தல்
உன்னல் - நினைத்தல்

ஊன் - மாமிசம்
ஊண்- உணவு

கன்னி - குமரி
கண்ணி - கண்ணை உடையவள்

கான் - காடு
காண் - பார்

தின் - சாப்பிடு
திண் - வலிமை

தன் - தனது
தண் - குளிர்ச்சி

மனம் - உள்ளம்
மணம் - வாசனை

இது போன்ற னகர ணகர நகர வேறுபாடுகள் பற்றி பள்ளிப் பருவத்திலேயே படித்திருந்தாலும், இன்னும் ஒரு முறை தெரிந்து கொள்வது நல்லது தானே!

************************************************************

"என்னடா ரெடி ஆயிட்டியா?" என்று கேட்பது பழகிப்போன ஒன்று. ரெடியை தமிழாக்கம் செய்யும்போது "தயார்" என்று எழுதுவது வழக்கம். ஆனால் "தயார்" தூய தமிழ்ச்சொல் கிடையாது.

தயார் என்பது "ஆயத்தம்" என்ற தமிழ்ச்சொல்லில் பிறமொழிச்சொல் தான்.

இங்கே தயாரிப்பு, தயாரித்தல், தயாரிப்பாளர் போன்ற சொற்கள் தமிழ்ச்சொற்களா?

இதர அரபிய, பாரசீக, பிற சொற்களும் அதற்கு நிகரான தமிழ்ச்சொற்களும்...

அசல் - மூலப்பொருள்
பாக்கி - நிலுவை
ஜாக்கிரதை - கவனம்
தபால் - அஞ்சல்
பஞ்சாயத் - ஐவர் குழு
பட்டுவாடா - பகிர்ந்தளித்தல்
படுதா - திரச்சீலை
பந்தோபஸ்து - திட்டபடுத்திய ஒழுங்கு
பல்லாக்கு - சிவிகை
பஜாரி - வாயாடி
பதில் - மறுமொழி
பாத் - சோறு
பகாளாபாத் - தயிர்சோறு
பூரா - முழுதும்
பேஷ் - மிக நன்று
மஹால் - அரண்மனை
மாகாணம் - மாநிலம்
மாஜி - முன்னைய
முகாம் - தங்குமிடம்
முலாம் - மேற்பூச்சு
மைதானம் - திடல்
ரத்து - விலக்கு
லாயக்கு - தகுதி
வகையறா - முதலான
வாரிசு - உரியவர்
ஷோக் - பகட்டு

************************************************************

இணையதள பயனர்கள் அனைவருக்கும் விக்கிப்பீடியாவைத் தெரியாமல் இருக்காது. அனைத்து வகையான தகவல்களையும் தருவதால் இதற்குக் கட்டற்ற களஞ்சியம் என்று பெயரிட்டுள்ளார்கள்.

விக்கிப்பீடியாவில் அனைத்து மொழிகளிலும் கட்டுரைகள் வெளியிடப்படுவதும் நமக்குத் தெரிந்ததே!

இதில் தமிழில் எத்தனை கட்டுரைகள் வந்துள்ளன என்று பார்த்தால் நமக்குக் கிடைப்பது அதிர்ச்சியே. இதுவரை தமிழில் 18000 கட்டுரைகள் மட்டுமே வெளியாகியுள்ளன.

மற்ற நாட்டு மொழிகளில் எத்தனை கட்டுரைகள் வெளியாகியுள்ளன என்று பார்த்தால் கிடைப்பவை இதோ...

ஆங்கிலம் - 29 லட்சத்துக்கும் அதிகம்
பிரென்சு - 8 லட்சத்துக்கும் அதிகம்
செருமன் - 9 லட்சத்துக்கும் அதிகம்.
சுவோமி ( பின்னிஷ் ) - 2 லட்சத்துக்கும் அதிகம்
தெலுங்கு - 40 ஆயிரம்...

ஆங்கிலம், பிரென்சு, செருமன் போன்ற மொழிகள் உலகெங்கும் பரவலாக பயன்படுத்தப்படுவது நமக்குத் தெரிந்ததே. ஆனால் பின்னிஷ் மொழியில் பேசுவோர் எண்ணிக்கை 50 லட்சம் பேர் தான். அதாவது சென்னை நகர மக்கள்தொகையை விடக் குறைவு.

பின்னிஷ் மொழி 700 ஆண்டுகள் வரலாறு கொண்டவையே! ஆனால் தமிழ்மொழி? தமிழ் மொழி இலக்கணம் பற்றிய நூலான தொல்காப்பியத்தை இயற்றியது 2000 ஆண்டுகட்கு முன்பு!

50 லட்சம் பேர் பேசும் "சுவோமி" மொழியில் 2 லட்சம் கட்டுரைகள் உள்ளன என்றால் 7 கோடிப்பேர் பேசும் தமிழ் மொழியில் எத்தனை கட்டுரைகள் இருக்க வேண்டும்?

பல துறைகள் பற்றியும் பதிவுகளை எழுத ஆரம்பித்திருக்கும் நாமும், இது போல களஞ்சியங்களுக்குக் கட்டுரைகளை எழுதலாமே! நம்மைத் தடுக்கும் காரணங்கள் எவை?

தவறாக எழுதிவிடுவோமோ என்ற பயமும், ஐயமுமே காரணம். ஐயத்தைப் போக்க நமக்கு வேண்டியது ஒரு நல்ல இலக்கண நூல்! அனைவரது வீட்டிலும் "WREN & MARTIN - GRAMMAR" நூல் இருக்கும் போது தமிழ் இலக்கணம் பற்றிய நூல் இல்லை என்றால் நன்றாகவா இருக்கும்?

தமிழில் எழுதும் போது நமக்கு ஏற்படும் ஐயங்களில் குறிப்பிடத்தக்கவை "ர, ற" வேறுபாடு.

தந்தைக்கு மகன் மீது மிகுந்த "அக்கரை" என்று எழுதுவது சரியா? அல்லது "அக்கறைச்" சீமை அழகினிலே என்று எழுதுவது தான் சரியா?

அக்கரை என்றால் - அந்தக் கரை
அக்கறை என்றால் - கவனம்

இது போல இதர "ர, ற" வேறுபாடுகள் கீழே..

அரம் - ஒரு கருவி
அறம் - தருமம்

அரை - மாவாக்கு
அறை - வீட்டுப்பகுதி

ஆர - நிறைய
ஆற - சூடு குறைய

இரங்கு - கருணைகாட்டு
இறங்கு - கீழே வா

உரை - சொல்
உறை - அஞ்சல் உறை

எரி - தீ
எறி - வீசு

கரி - அடுப்புக்கரி
கறி - காய்கறி

கருப்பு - பஞ்சம்
கறுப்பு - நிறம்

கரை - கடற்கரை
கறை - மாசு

கோருதல் - விரும்புதல்
கோறல் - கொல்லுதல்

சிரை - மயிரை நீக்கு
சிறை - சிறைச்சாலை

சொரிதல்- பொழிதல்
சொறிதல்- நகத்தால் தேய்த்தல்

பரந்த - பரவிய
பறந்த - பறந்துவிட்ட

பரவை - கடல்
பறவை - பட்சி

பாரை - கடப்பாரை
பாறை - கற்பாறை

பெரு - பெரிய
பெறு - அடை

பொரித்தல் - வறுத்தல்
பொறித்தல் - கல்லில் எழுத்துப் பொறித்தல்

பெரும்பாலானோர்க்கு இந்த வேறுபாடுகள் தெரிந்திருக்கும். தெரியாதவர்களுக்குப் பயனளித்தால் நல்லது தானே!

************************************************************

அரபிய, பாரசீக, பிற சொற்களும் அதற்கு நிகரான தமிழ்ச்சொற்களும்...

இலாகா - துறை
உஷார் - விழித்திரு
உருமால் - தலைப்பாகை
கசாபு - இறைச்சி
குஷி - மகிழ்ச்சி
சபாஷ் - பலே, சிறப்பு
சொக்கா - உடை
ஜமக்காளம் - விறிப்பு
ஜல்தி - விரைவு
ஜவ்வாது - வாசனைப்பொருள்
ஜிமிக்கி - தொங்கட்டான்
ஜில்லா - மாவட்டம்
தகரார் - சண்டை
தமாஷ் - நகைச்சுவை
தர்பார் - அரசவை
தாலுகா- வட்டம்
பக்கா - நிறைவு
பஜார் - கடைவீதி
பைல்வான் - பலசாலி..

சோம்பேரி, சோம்பேறி.. எது சரி? "ல, ழ, ள" வேறுபாடுகள் அடுத்த கட்டுரையில்..!

எமது பயன்பாட்டில் தமிழ் - 6