Profile of  Veluppillai Thangavelu 

Birth and Educational Background

 

Thiru Thangavelu is a Tamil Canadian of Thamil Eelam origin. His native village is Colombothurai in the outskirts of Jaffna Municipality. He was born on February 10, 1933 in a modest farming family. He is married and has 6 children (5 boys and 1 girl) and 10 grand children. 

 

After finishing his 4th standard at Colombothurai Maha Vidylayam he joined St. John’s College, a leading and popular school in Jaffna, in 1943. He was one of the 3 students out of 120 to pass the Senior School Certificate exam held in 1950.  He studied part-time for 4 years at the Colombo Technical College and obtained his Diploma in Accounting in 1963.

 

Thiru Thangavelu won a British Commonwealth Scholarship for 2 years under the Colombo Plan.  During this period he studied for the Associated Chartered Certified Accountant (ACCA) final examination at the Birmingham University, UK and graduated successfully in 1970.

 

After migrating to Canada in 1987 he successfully completed his Certified General Accountants final examination in 1991 and obtained CGA membership in the same year.

 

Career achievement

 

Thiru Thangavelu joined the Government Clerical Service in 1952. Later he joined the Local Government Service as an Accountant and served in  Jaffna Municipal Council (1966-1972) Batticaloa Municipal Council (1972-1973)  Dehiwela Mt. Lavania Municipal Council (1973-1977) and Colombo Municipal Council (1977-1980).  He was also acting Municipal Commissioner (1967-1968) of Jaffna Municipality. 

 

In 1980 he joined the Bauchi State (Nigeria) Audit department as Principal Auditor.

In 1987 he resigned his post and migrated to Canada and joined A. A. Jamal Associates, Chartered Accountants, Markham as an Auditor.  He retired in 1995.

 

Trade Union Activist

 

Thiru Thangavelu was a leading trade unionist from 1953 to 1980. He was a founder member (1959-1966), editor and general  secretary (1964-1966) of the Arasanka Ezhthu Vinaignar Sankam. AES was founded  after breaking  from Government Clerical Service Union dominated by majority Sinhalese.  He also served as the President of Local Government Accountants Association from 1973-1980. 

 

Community Service

 

Thiru Thangavelu  served as Vice President of World Thamil Movement from 1991-1999.  WTM is the leading community based voluntary organization in Canada involved in promoting Thamil language, culture and general welfare of Thamil Canadian community. During this period he was actively involved in tackling gang related violence among Thamil youths in Metro Toronto. He interacted with two feuding youth factions and brought about an amicable settlement between them in 1994 and the truce lasted for full 12 months.

 

Thiru Thangavelu  also was very active with  Federation of Associations of Canadian Thamils (FACT)  in promoting the cause of Thamil nationalism and liberation. He served as its president for several years.  

 

Journalism

 

Thiru Thangavelu is also a leading journalist who writes on political, social and human rights issues both in Thamil (under the pen-name Nakkeeran) and English. He wrote extensively in Sutantiran (now defunct) in the fifties, sixties and seventies. He also functioned as editor of “Sudar” magazine from 1978-1980)  So far he has written more than 2,000 articles both in Thamil and English. Since retirement (1995) he has devoted his entire time and energy to advance Thamil nationalism and liberation, eschew superstitious beliefs and promote scientific temper among the Thamil Canadian community here and broad. He writes weekly political columns in Ulagathamilar and Paraparappu and anti- Astrology series in Paraparappu Journal.

 

He hosts web site URL http://www.nakkeran.com/home  He is also  the Moderator of Thamilvaddam News Group.

 

He is the author of  Sothidap Puraddu (Astrology is Fraud) which was released in Thamil Nadu in 2006 by Periyaar Dravidar Kazhakam.  This book (700 pages) in Thamil is the first to comprehensively debunk astrology with facts and figures. It will be released in Toronto during forthcoming summer.

 

Thiru Thangavelu is the President of Thamil Creative Writers Association (TCWA) founded in 2002. This Association has the following objectives-

 

To use Thamil language as the language of worship in places of worship;

 

To conduct marriage ceremonies in Thamil language only;

 

To use and speak Thamil language as home language at all times;

 

To name Thamil children with pure Thamil names;

 

To use   Thamil words when addressing father, mother and relations;

 

To promote Thamil Language. Arts, Literature and Culture;

 

To spread Rationalism, promote scientific temper and Modernity;

 

To translate and publish books on Science and Technology in Thamil language;

 

To observe and celebrate the first day of the month of Thamil Thai (January 14) as
Thamil New Year, Pongal Festival (Thanks Giving Day) and the birth day of Saint
Thiruvalluvar.  Thiruvalluvar’s magnum opus Thirukkural, a treatise on ‘the Art of Living'

and hailed by Dr. Albert Schweitzer as one of the purest expressions of human thought.

 

To unite all creative writers world-wide and help publish their works; and

 

To generally promote Thamil Nationalism and Thamil National identity.

 

தமிழ் எங்கள் உயிர்!
தமிழ்க் கலை எங்கள் மூச்சு!
தமிழ்ப் பண்பாடு எங்கள் வாழ்வு!
திருக்குறள் எங்கள் வழிகாட்டி!

 


 

நூலாசிரியர் (சோதிடப்புரட்டு)

திரு. நக்கீரன் யாழ்ப்பாணம்; கொழும்புத்துறையில் பிறந்தவர். அவரது இயற் பெயர் வேலுப்பிள்ளை தங்கவேலு ஆகும்.

நக்கீரன் தனது தொடக்கக் கல்வியை கொழும்புத்துறை மகா வித்தியாலயத்திலும் உயர் கல்வியை சுண்டிக்குளி பரி.யோவான் கல்லூரியிலும் படித்து முடித்தார்.

1951 ஆம் ஆண்டு அரச சேவையில் எழுத்தராகச் சேர்ந்தார். 1956 இல் தனிச் சிங்களச் சட்டம் இலங்கை நாடாளுமன்றத்தில் நிறைவேறியதைத் தொடர்ந்து தமிழ் அரச ஊழியர்களது இருக்கை நெருக்கடிக்கு ஆளானாது. சிங்களவரைப் பெரும்பான்மையாகக் கொண்ட அரசாங்க பொது எழுதுவினைஞர் சங்கம் (GCSU) தமிழ் ஊழியர்களைக் கை கழுவி விட்ட நிலையில் அவர்களது உரிமைகளுக்குப் போராட திரு. க. சிவானந்தசுந்தரம் அவர்கள் தலைமையில் 1959 ஆம் ஆண்டு அரசாங்க எழுதுவினைஞர் சங்கம் (AES) தொடக்கப்பட்டது. திரு. நக்கீரன் அதன் தொடக்க உறுப்பினராகவும் சங்கத்தின் வெளியீடான எழுச்சி திங்கள் ஏட்டின் ஆசிரியராகவும் பின்னர் பொதுச் செயலாளராகவும் (1964-66) பணியாற்றினார்.

1962 இல்  திரு அ. அமிர்தலிங்கள், நா.உ. தலைமையில் தமிழ்முறைத் திருமணம் செய்து கொண்ட இவர் தீவிர தமிழ்ப்பற்றாளரும் பகுத்தறிவாளரும் ஆவார்.

1966 ஆம் ஆண்டு யாழ்ப்பாண மாநகரசபையில் கணக்காளராக நியமனம் பெற்றார். சிறிது காலம் பதில் ஆணையாளராகவும் கடமை ஆற்றினார். இந்தக் கால கட்டத்திலேயே பதின் மூன்று இலக்கம் உருபாய் செலவில் யாழ்ப்பாண சந்தை (Model Market)  கட்டும் பணி தொடங்கப்பட்டது. 1968 இல் புலமைப் பரிசு பெற்று பர்மிங்கம் பல்கலைக் கழகத்தில் 2 ஆண்டு படித்து யுஊஊயு (ருமு) இறுதிக் கணக்கியல் தேர்வு எழுதிப் பட்டம் பெற்றார்.

நக்கீரனின் ஆக்கங்கள் ஐம்பதுகளில் இருந்து சுதந்திரன் கிழமை ஏட்டில் தொடர்ந்து வெளிவந்தன. அதில் 'எமது வரலாறு' என்ற நீண்ட தொடர் கட்டுரை (1964-1965) திரு. அ. அமிர்தலிங்கம் (நா.உ) அவர்களது பெயரில் வெளிவந்தது. சுதந்திரன் பதிப்பகத்தின் இன்னொரு திங்கள் வெளியீடான சுடர் ஏட்டின் ஆசிரியராகவும் (1978-1980) பணியாற்றினார்.

தமிழ்த் தேசிய விடுதலைப் போராட்டத்தோடும் அரசியல் தலைவர்களோடும் மிக நெருக்கமான ஈடுபாடு வைத்திருந்த இவர் 1980 இல் நைசீரியா, பவுச்சி மாநில கணக்காய்வுத் திணைக்களத்தில் முதன்மைக் கணக்காய்வாளாராகச் சேர்ந்தார். பின்னர் 1987 இல் கனடாவுக்குப் புலம் பெயர்ந்த இவர் A.A. Jamal Associates (Chartered Accountants)   நிறுவனத்தில் பணி புரிந்தார். அதே நேரம் CGA (Canada)  தேர்வுக்குப் படித்து 1991 ஆம் ஆண்டு பட்டம் பெற்றார்.

உலகத் தமிழர் இயக்கத்தின் துணைத் தலைவராக 10 ஆண்டுகள் தொடர்ந்து பணியாற்றினார். கனடிய தமிழர் சங்கங்களின் பேரவையின் (FACT) தலைவராகவும் பல ஆண்டு பணி ஆற்றினார்.

உலகத்தமிழர் ஏட்டில் தமிழ்த் தேசியத்துக்கு உரம் சேர்க்கும் வகையில் கிழமை தோறும் எழுதி வந்த 'அரசியல் பலகை' 'சங்கப் பலகை' இரண்டும் அவரை ஒரு சிறந்த அரசியல் ஆய்வாளராகவும் ,லக்கியவாதியாகவும் எடுத்துக்காட்டியது.

கடந்த 15 ஆண்டு காலாமாக முழுநேர எழுத்தாளராக விளங்கும் வர் இங்கு வெளியாகும் முழக்கம்,  நம்நாடு,  ஈழநாடு, ஈழமுரசு, முரசொலி போன்ற இதழ்களில் அரசியல், வரலாறு, இலக்கியம், பகுத்தறிவு மற்றும் திறனாய்வுக் கட்டுரைகள் பலநூறு நக்கீரன், கீரன், திருமகள், இந்திரஜித், போன்ற புனைபெயர்களில் எழுதியுள்ளார். இதில் ஒல்காப் புகழ் தொல்காப்பியம், கியூபா பயணக்கட்டுரை, சோதிடப் புரட்டு, சாதி மதப் பேயை விரட்டிய சித்தர்கள், சுனாமியும் சுவாமியும்;, மாமியார் வீட்டில் மூன்று சாமியார்கள் தமிழிசை (முழக்கம்) சங்கம் வழர்த்த தமிழ், கண்டி இராச்சியத்தின் கடைசி மன்னன் ஸ்ரீவிக்கிரம இராசசிங்கன் (ஈழநாடு) திருக்கோயில்களில் தமிழில் வழிபாடு (ஈழமுரசு) ஆகிய தொடர்கட்டுரைகள் படிப்போர் பலரது பாராட்டைப் பெற்றன. நம்நாடு ஏட்டில் வெளிவந்த 'நான்தாண்டா ஆத்தாளு' என்ற குறு நாவல் உண்மைச் சம்பவங்களை அடிப்படையாக் கொண்டது.

ஆங்கில மொழியில் தனது இயற் பெயரில் எழுதிய சூடான அரசியல் கட்டுரைகள் TamilCanadian, Tamil Nation, Tamil Sangam, TIS போன்ற இணைய தளங்களில் வெளிவந்துள்ளன.

இதற்குமுன்னர் இவர் எழுதிய தமிழர் திருமணம் என்ற நூல் வெளிவந்திருந்தாலும் சோதிடப் புரட்டு மட்டுமே ஒரு முழுமையான ஆய்வு நூலாக வெளிவருகிறது.

நக்கீரனது ஆக்கங்களை WWW.Nakkeran.com என்ற இணைய தளத்தில் படிக்கலாம்.






எமது வளர்ச்சியின் உயிரியன் (vitamin)  ஐயா நக்கீரன்!

'நக்கீரன்' என்று புலம்பெயர் தமிழ் இலக்கிய உலகாலும் 'ஐயா' என்று தமிழ் இன உணர்வாளர்களாலும் அன்போடு அழைக்கப்படும் திரு. வேலுப்பிள்ளை தங்கவேலு அவர்களுக்கும் முழக்கத்துக்கும் ஆன பிணைப்புக்குப் பதினொரு வயதாகிவிட்டது. இந்தப் பதினொரு ஆண்டுகளும் எமது இதழின் வளர்ச்சிப் படியின் ஒவ்வொரு கட்டத்திலும் சிறந்த ஒரு வழிகாட்டியாக, துணையாக, பக்க பலமாகத் திகழ்ந்து வந்துள்ளார் ஐயா 'நக்கீரன்'.

கொழும்புத்துறையைச் சேர்ந்த தில்லையர் வேலுப்பிள்ளை - சோலையர் வள்ளியம்மை இணையருக்குப் பிறந்தோர் மூவரில் ஒருவர் ஐயா 'நக்கீரன்'. இவர் தனது ஆரம்பக் கல்வியைக் கொழும்புத்துறை மகாவித்தியாலயத்திலும் உயர் கல்வியை யாழ். பரியோவான் கல்லூரியிலும் கற்றார். அதன் பின்னர் கொழும்பு நகரில் அமைந்துள்ள கொழும்பு தொழில்நுட்பக் கல்லூரியிலும் இங்கிலாந்தில் அமைந்துள்ள பெர்மிங்கம் பல்கலைக் கழகத்திலும் கணக்கியல் தொடர்பான மேற்படிப்பைத் தொடர்ந்தார். எசிசிஎ பட்டத்தினை இங்கிலாந்திலும் சிஜிஏ படிப்பினைக் கனடாவிலும் நிறைவு செய்துள்ளார் ஐயா நக்கீரன்.

1962ஆம் ஆண்டு சரோஜினி என்னும் மங்கை நல்லாளைத் தமிழ்முறைத் திருமணத்தின் மூலம் கைப்பிடித்து குழந்தைகள் ஆறுபேரையும் பேரன் பேத்திகள் ஏழுபேரையும் பெற்றுள்ளார்.
முதலில் எழுத்தராகவும் பின்னர் கணக்காளராக யாழ் நகர சபையிலும் தொடர்ந்து பதில் ஆணையாளராக யாழ் மாநகர சபையிலும் கணக்காளராக மட்டக்களப்பு மாநகர சபையிலும் முதன்மைக் கணக்காளராக தெகிவளை மவுண்ட்லேனியா மாநகர சபையிலும் முதன்மை உள்ளகக் கணக்காய்வாளராகக் கொழும்பு மாநகர சபையிலும் துணைக் கணக்காய்வாளராக நைஜீரியா நாட்டு அரச கணக்காய்வுத் திணைக்களத்திலும் பணிபுரிந்துள்ளார் ஐயா நக்கீரன். தொடர்ந்து கனடா நாட்டுக்குப் புலம்பெயர்ந்து வந்தபின் மார்க்கம் நகரில் அமைந்துள்ள ஏ.ஏ ஜமால் நிறுவனத்தில் கணக்காய்வாளராகப் பணிபுரிந்துள்ளார்.

தொழில்ரீதியாகக் கணக்காய்வுத் துறையில் பணிபுரிந்துகொண்டே இலக்கியத் துறையிலும் தனது பங்களிப்பைச் செலுத்தி வந்துள்ள நக்கீரன் ஐயா அவர்கள் இள வயதில் 'எழுச்சி' என்னும் தொழிற்சங்க திங்கள் இதழின் ஆசிரியராகவும் இலங்கை சுதந்திரன் செய்தி இதழின் வெளியீடான 'சுடர்' சிறப்பு இதழின் ஆசிரியராகவும் பின்னர் கனடா வந்தபின் 'ஈழமுரசு செய்தி' இதழின் ஆசிரியராகவும் செயற்பட்டு வந்தார்.

இளமைக் காலத்தில் பொது எழுதிவினைஞர் சேவைச் சங்கத்தின் இரத்தினபுரி மற்றும் திருகோணமலை மாவட்டச் செயலாளராக இருந்து வந்து நக்கீரன் ஐயா அவர்கள், அரசாங்க எழுதுவினைஞர் சங்கத்தின் ஆரம்பகால உறுப்பினராகவும் தொடர்ந்து செயற்குழு உறுப்பினராகவும் பின்னர் பொதுச்செயலாளராகவும் கடமை ஆற்றியுள்ளார். அது மட்டுமல்லாது உள்ள10ராட்சி கணக்காளர் சங்கத்தின் தலைவராகவும் இலங்கையில் சேவையாற்றியபின் கனடிய நாட்டுக்கு வந்தபின் கனேடியத் தமிழர் சங்கங்களின் பேரவையின் (FACT) தலைவராகப் பெரும் சேவை ஆற்றினார் என்பது அனைவரும் அறிந்ததே.

இன்று முழக்கம் இதழில் 'நக்கீரன்' 'திருமகள்' 'கீரன்' ஆகிய புனைபெயர்களில் மக்களை சிந்திக்க வைக்கும் பகுத்தறிவுக் கட்டுரைகளையும் அரசியல் ஆய்வுக் கட்டுரைகளையும் தொடர்ந்து எழுதிவரும் திரு. தங்கவேலு அவர்களுக்கு வயதுதான் எழுபதைத் தாண்டிவிட்டது. ஆனால் மனதால் என்றும் அவர் இளையவர்தான். இளையவர்களுக்குண்டான துடிப்பு, உழைப்பு, துணிச்சல் அனைத்தையும் இன்றும் ஒருங்கேகொண்டவர் எங்கள் 'நக்கீரன்' ஐயா. ஒவ்வொரு நாளும் அவர் எழுதிய ஒரு கட்டுரையையேனும் ஏதாவது ஒரு செய்தி இதழிலோ, இணையத்தளம் ஒன்றிலோ பார்க்காவிடின் அன்று அவருக்கு உடல்நலக்குறைவாக இருக்கவேண்டும் என்ற முடிவுக்கு நாம் தாராளமாய் வரலாம். அத்தகைய சுறுசுறுப்பையும் அசராத உழைப்பையும் வேகத்தையும் எழுத்து வன்மையையும் அஞ்சாத் தன்மையையும் கொண்டவர் எங்கள் 'நக்கீரன்' ஐயா.

முழக்கம் இதழில் ஐயா அவர்கள் கடந்தகாலங்களில் எழுதிய 'ஒல்காப் புகழ் தொல்காப்பியம்'இ 'கியூபா பயணக்கட்டுரை', 'சோதிடப் புரட்டு', 'சாதி மதப்பேயை விரட்டிய சித்தர்கள்' 'சுனாமியும் சுவாமியும்' 'மாமியார் வீட்டில் மூன்று சாமியார்கள்' ஆகிய தொடர்கட்டுரைகள் படிப்பாளர் பலரதும் ஏகோபித்த பாராட்டைப் பெற்றது குறிப்பிடத்தக்கது.. கனடாவிலிருந்து மட்டுமல்லாது இணையத்தளமூடாக அவரது இக்கட்டுரைகளை வாசித்த உலகம் முழுதும் பரந்து வாழும் தமிழின உணர்வாளர்கள் தமது பாராட்டைத் தெரிவித்து ஆயிரக்கணக்கில் மின்னஞ்சல்களை எழுதிக் குவித்திருந்தனர் என்பதை என்றும் மறக்கமுடியாது. அதுமட்டுமன்றி, இக்கட்டுரைகள் மூலம் ஐயா அவர்கள் தமிழுலகில் ஒரு தாக்கத்தை ஏற்படுத்தினார் என்பதையும் யாராலும் மறுக்க முடியாது.

பத்தாண்டுகளுக்கு முன்னர் உலகத்தமிழர் இதழில் தொடராக அவர் எழுதிவந்த 'சங்கப் பலகை' சங்கத் தமிழை இளையவரும் சுவைத்து மகிழ்ந்திடும் வகையில் சுவைபட எழுதப்பட்டு வந்தது என்பதையும் இங்கு நினைவுகூருவது பொருத்தம். அதே இதழில் அவர் எழுதிவந்த 'அரசியற் பலகை'யின் மூலம் அவ்வார அரசியல் மாற்றங்களை அலசி ஆராய்ந்ததானது அவரை சிறந்ததொரு அரசியல் ஆய்வாளராக எமக்கு எடுத்துக்காட்டியது.

இவரது எழுத்து மிகவும் வலிமையானது. ஒவ்வொரு கட்டுரையும் - அவரது சமூக அக்கறையைப் புடம்போட்டுக் காட்டும் ஒரு கருவியாக, பகுத்தறிவு எண்ணங்களை விதைக்கும் விளைநிலமாகச் செயற்பட்டுள்ளது என்றால் அது மிகையாகாது.

இன்று கனடாத் தமிழ்ப் படைப்பாளிகள் கழகத் தலைவராக தமிழ்மொழிக்கும் இனப் பாதுகாப்புக்கும் அவர் ஆற்றிவரும் பணிகள் எவரோடும் ஒப்பிடமுடியாதது. நாற்பது ஆண்டுகளுக்கு முன்னரே தனது திருமணத்தைத் தமிழ்முறையில் திருக்குறள் ஓதி நிறைவேற்றித் தனது வாழ்க்கை நிகழ்வொன்றின் மூலமே ஈழத்தமிழர்களின் மூடக்கொள்கைகளுக்கு முதல் அடி கொடுத்தவர் எங்கள் 'நக்கீரன்' ஐயா.

இன்னார் தனது வாழ்க்கைமூலம் வரலாற்றில் சுவடு பதித்தவர் என்பதைப் பெரும்பாலும் ஒருவர் மரணித்தபின்னரே சொல்வதுண்டு. தனது வாழ்வு - வரலாற்றில் ஒரு பதிவாய் அமைந்ததா? என்பதை உயிரோடு இருக்கும்போதே ஒருவர் அறிந்துகொண்டாரே ஆயின், அவரது வாழ்க்கை குறித்த திருப்தியை அவர் வாழும்போதே பெற்றுக்கொள்வாரல்லவா? வாழ்வு முடியும்போதும் நம் வாழ்வு பயனுள்ளதாய் அமைந்ததா..? என்று எண்ணி ஏங்கிக்கொண்டே இவ்வுலகை நீங்குவது சாதாரண மனிதர் வாழ்வில் வேண்டுமானால் நடக்கட்டும். எங்கள் நக்கீரன் ஐயா - சாதாரணமானவர் அல்ல. அவரது வாழ்வு குறித்த விமர்சனத்தை அவர் இன்றே அறிந்துகொள்ளட்டும். வாழ்வு குறித்த யதார்த்தத்தையும் வாழ்வு குறித்த விமர்சனத்தையும் ஏற்றுக்கொள்ளும் பக்குவத்தையும் அடைந்தவர் எங்கள் நக்கீரன் ஐயா! ஆகையால்தான் அவருக்கு இதை சொல்ல விரும்புகிறோம்.

'ஆம்..!

ஐயா - உங்கள் வாழ்க்கை முழுமையானது. வாழ்க்கை குறித்த திருப்தியால் உங்கள் மனங்களை நீங்கள் இனி நிறைக்கலாம். உங்களுடைய தனிப்பட்ட வாழ்க்கையில், எங்கள் வாழ்வில், முழக்கத்தின் வரலாற்றில், கனடியத் தமிழர் மனங்களில், தமிழின உணர்வாளர்கள் நெஞ்சங்களில் என்று அனைத்திலுமே என்றும் அகலாப் பதிவுகளைப் பதித்துள்ளீர்கள் நீங்கள். 'வாழ்க்கை குறித்த திருப்தியை நெஞ்சு முழுக்கச் சுமக்கும் தகுதியை இன்றே பெற்றுவிட்டீர்கள்' என்று நாம் வாய்விட்டுக் கூறக்கூடிய மிகச்சிலருள் ஒருவர் நீங்கள். உங்கள் கருத்திலிருந்து வேறுபட்டவர்கள், முரண்பட்டவர்கள் என்று சிலர் இருந்தாலும் அவர்களாலும் மதிக்கப்படுபவர் நீங்கள்.

'கிழட்டுப்புலி' என்ற பெருமைக்குரியவராய் கனடியத் தமிழரால் மட்டுமல்லாது தமிழின விரோதிகளாலும் கனடியப் புலனாய்வுத் துறையினராலும்கூட என்றும் போற்றப்படுவீர்கள் நீங்கள்.

தம் கொள்கைகளை வெறும் பேச்சளவில் மட்டும் வைத்திருக்கும் வீண் மாந்தர் போலல்லாது, உங்கள் குழந்தைகளின் தமிழ்த் திருமணமுறை மூலமாகவும, பேரன், பேத்திகளுக்கு இட்ட தூய தமிழ்ப் பெயர்கள் மூலமாகவும் உங்களை நிரூபித்துள்ளவர் நீங்கள்.

உங்கள் சோதிடப்புரட்டு கட்டுரைத் தொடர் தமிழ் அரசொன்று அமையும் காலத்தில் உறுதியாய்ப் பள்ளிப் பாடத்திட்டத்தில் சேர்க்கப்பட்டு பகுத்தறிவுச் சிந்தனையை உருவாக்கும் ஊடகமாய்ச் செயற்படும்.

உங்கள் தனிப்பட்ட வாழ்வின் இனிமையை உங்கள் துணைவியாரின் முகத்திலிருந்து என்றுமகலா முறுவலிலும் தங்கள் வயதுத் தோழனாய் உங்களோடு பழகும் உங்கள் பேரன் பேத்திகளிலும் நாம் காண்கிறோம்.

இவ்வுலகில் தமிழர்க்கென அரசொன்று அரங்கேறும் நாள் எங்கள் தலைவரின் முகத்தில் எழும் அந்த அழகிய புன்னகையைக் காண, அற்புத உணர்வைப் பகிர்ந்து கொள்ள அருகில் நீங்கள் இருக்கவேண்டும். ஆகையால் நாங்கள் உங்களிடம் இருந்து எதிர்பார்ப்பது உங்கள் நோயற்ற வாழ்வை மட்டும்தான்.

வேறு எதையும் இல்லை!

நன்றி!

உங்கள் முழக்கம்




என்னுரை

சோதிடப் புரட்டு என்ற தலைப்பில் எழுதிய முதல் கட்டுரையை முழக்கம் கிழமை ஏட்டில் வெளிவந்த பொழுது அதனை அடுத்த நான்கு அல்லது அய்ந்து கிழமைகளில் முடித்து விடலாம் என்றே நான் முதலில் நினைத்தேன். அது 70 கிழமைகள் வளரும் என்பதை நான் சற்றும் எதிர் பார்க்கவில்லை.

சிறு பருவதில் ஏனையோர்களைப் போலவே நான் மிகவும் சமய நம்பிக்கை உடையவனாகவே இருந்தேன். கோயிலுக்குத் தவறாது போவேன். கோயில் மணி அடிப்பது, தண்டேசுவரர் தூக்குவது, கோயில் பூந்தோட்டத்துக்குத் தண்ணீர் இறைப்பது போன்ற தொண்டுகள் செய்வதில் முன்னுக்கு நிற்பேன். நல்லூர் கொடி ஏறினால் பல நாள்கள் நடந்தே சென்று முருகனைக் கும்பிட்டுத் திரும்புவேன். கச்சான் கடலை வாங்க வீட்டில் தரும் 25 சதத்தில் வடிவான கடவுள் படங்களை வாங்கி வருவேன்.

ஊர்க் கோயில் அருச்சராக இருந்த (1948 - 50 ) வைரவநாதக் குருக்களிடம் சமற்கிருதமும் படித்தேன். ஆனால் அது நீடிக்கவில்லை.

க.பொ.த. (சாதாரண) தேர்வு (1950) எழுதுவதற்குப் போகு முன்னர் காலை கோயிலுக்குச் சென்று கிணற்றில் அள்ளிக் குளித்து முட்டுக்காய்த் தேங்காய் அடித்துப் பிள்ளையாரைக் கும்பிட்டேன். தேங்காய் சரி பாதியாக உடைந்தால் அது தேர்வில் வெற்றிக்கு அறிகுறி! கோணல் மாணலாக உடைந்தால் தோல்விக்குக் கட்டியம்! அப்படியொரு நம்பிக்கை இருந்தது.
நான் கல்லில் உடைத்த தேங்காய் கோணல் மாணலாகவே உடைந்தது. அது கெட்ட 'சகுனம்' என்று நினைத்துக் கொண்டேன். என்னுடன் அதே தேர்வை அதே நாளில் எழுத இருந்த உறவினர் ஒருவர் அடித்த தேங்காய் நல்ல வண்ணமாகச் சரிபாதியாக உடைந்தது. அதன் பொருள் அவருக்குத் தேர்வில் வெற்றி என்பதாகும்!

தேர்வு முடிவுகள் வந்த பொழுது பரி. யோவான் கல்லூரி அறிவித்தல் பலகையில் அடியேன் பெயர் உட்பட 3 மாணவரது பெயரே வெற்றி என்றிருந்தது. எஞ்சிய 117 மாணவரும் தோல்வி! அதில் தேங்காய் சரி பாதியாக உடைத்தவரும் ஒருவர் ஆவார்! கல்லூரி முதல்வர் K.T. அருளானந்தம் அவர்களுக்கு அந்தப் பெறுபேறுப் பட்டியலை நம்ப முடியவில்லை. எங்கோ தவறு நடந்துவிட்டதாக நினைத்தார்.

கடவுளுக்கு நான் கையூட்டுக் கொடுத்த கடைசித் தேங்காய் அதுவே ஆகும். அதன் பின் இன்றுவரை ஒரு பகுத்தறிவாளனாகவே இருந்து வருகிறேன்.

திருமணத்தின் பொழுது 'சாதகம்' பார்க்கக் கூடாது என்று கட்டுப்பாடு விதித்தேன். தமிழ்முறைத் திருமணம் செய்து கொண்டேன். இரண்டு மாலை, நாலு பேச்சாளர், பத்துத் திருக்குறளுடன் திருமண விழா இனிது நிறைவேறியது. மறைந்த நாடாளுமன்ற உறுப்பினர் திரு. அ. அமிர்தலிங்கம் அவர்கள் திருமண விழாவுக்குத் தலைமை தாங்கி நடத்தி வைத்தார்.

சிறு வயதில் எனது மூளையில் பேய் பிசாசு, பில்லி சூனியம், கொள்ளிவால் பிசாசு, கூடுவிட்டுக் கூடு பாயும் விக்கிரமாதித்தன் கதை, வேதாளம் முருக்க மரத்தில் ஏறிய கதை முதலியவையே திணிக்கப்பட்டன. கால் நிலத்தில் படாது அலையும் பேய்கள், புளியமரத்தில் வாசம் செய்யும் முனி, வேப்ப மரத்து வைரவர், சுடலையில் அரிசிப் பொரி பொறுக்கும் குறளி, இரத்தினம் கக்கும் ஆறுதலை நாகபாம்பு போன்ற கதைகள் எனக்குச் சொல்லப்பட்டன. ஊர்க் கோயில் புறத்தில் ஓங்கி வளர்ந்து நின்ற பாலை மரத்தடியில் பெரிய புதையல் இருப்தாகவும் சொல்லப்பட்டது!

பள்ளியில் படிக்கும் போதே ஆறு பாகம் கொண்ட பாரதக் கதையை இரவல் வாங்கிப் படித்து முடித்தேன். இராமாயணம் (உரைநடை) வீட்டில் இருந்தது. அதில் இராம - இராவண போரை வருணிக்கும் காண்டத்தை மீண்டும் மீண்டும் படிப்பேன். அந்த அகவையில் இராமன் எனது மனக் கட்டிலில் 'கடவுள் அவதார' மாகவும் இராவணன் 'அரக்க' னாகவும் அமர்ந்து கொண்டனர்.

பிற்காலத்தில் மரத்தின் பின்னால் ஒளிந்திருந்து வாலியைக் கொன்ற இராமன் எனக்கு ஒரு கோழையாகத் தென்பட்டான். அவ்வாறே சூர்ப்பனகையின் முலையையும் மூக்கையும் இராமன் தம்பி இலக்குவன் அரிந்து அவளை மூளி ஆக்கியது எனக்கு அநாகரிகமாகப் பட்டது.

கல்லூரியில் படிக்கும் பொழுதே பெரியார், பேரறிஞர் அண்ணா, கலைஞர், நாவலர் இவர்களது திராவிட- பகுத்தறிவுக் கொள்கையால் ஈர்க்கப் பட்டேன். அன்று வெளிவந்த திராவிடநாடு, மன்றம், முரசொலி, திராவிடன், காஞ்சி, ர்ழஅநடயனெ, தென்றல் முதலிய ஏடுகளையும் பெரியார், அண்ணா, கலைஞர், நாவலர், கண்ணதாசன் முதலியோர் எழுதிய நூல்கள், கட்டுரைகள் அனைத்தையும் தவறாது படித்தேன். இவற்றில் அண்ணா எழுதிய கம்பரசம், தீ பரவட்டும், ஏ தாழ்ந்த தமிழகமே! சொர்க்கவாசல், தம்பிக்கு போன்ற நூல்கள் எனது மனதில் பகுத்தறிவுக் கருத்துக்களை விதைத்து பலத்த தாக்கத்தை ஏற்படுத்தின.

அண்ணா கதை வசனம் எழுதி வெளிவந்த வேலைக்காரி, (1948) கலைஞரின் பராசக்தி (1952) நடிகவேள் எம்.ஆர். இராதா நடித்த இரத்தக்கண்ணீர் (1954) ஆகிய திரைப் படங்கள் ஒவ்வொன்றையும் 12 முறைக்கு மேலாகப் பார்த்திருப்பேன்.

திருக்குறள், சங்க இலக்கியங்கள், பாரதியார், பாரதிதாசன் பாடல்கள் என் மனதைக் கவர்ந்தன. ஒழுக்கத்தை வலியுறுத்தும் திருக்குறள் என் வாழ்க்கையைச் செம்மைப்படுத்த பெரிதும் உதவியது. சங்க இலக்கியங்கள் போற்றிய காதலும் வீரமும் கல்வியும் பொருளும் பெருமிதமும் என்னைத் தமிழர் நாகரிகம் பற்றிப் பெருமைப்பட வைத்தன.

காலப் போக்கில் கடவுள், கோயில், குளம், சோதிடம், கைரேகை, அட்டமி நவமி, இராகு காலம், பேய் பூதம், பில்லி சூனியம் போன்றவற்றில் எனக்கு இருந்த நம்பிக்கை அற்றுப் போயிற்று! புராணங்கள், இதிகாசங்கள் இன்றைய கல்கி, சாண்டில்யன் எழுதிய வரலாற்றுப் புதினங்கள் போன்றவை என்று கண்டு கொண்டேன்.

சோதிடப் புரட்டை எழுதத் தொடங்கிய பின்னரே ஒரு வில்லங்கமான பாடத்தை கையில் எடுத்துக் கொண்டதை உணர்ந்தேன். எனவே முதல் வேலையாக சோதிடம், வானியல் பற்றிய பல தமிழ் ஆங்கில நூல்களை விலைக்கு வாங்கிப் படித்தேன். இணைய தளத்தில் சோதிடம், வானியல் தொடர்பான ஏராளமான கட்டுரைகளை அச்செடுத்து ஒரு மாணவன் தேர்வுக்குப் படிப்பது போல் படித்தேன். சொல்லப் போனால் நூல்களிலும் பார்க்க இணைய தளமே எனக்குப் பேரளவு கைகொடுத்தது. வானியல் பற்றிய இணைய தளங்களின் எண்ணிக்கையைப் (565,000) பார்த்து மலைத்துப் போனேன்.

பள்ளியில் படிக்கும் மாணவருக்காகப் புகைப்படங்களோடும் வரைபடங்களோடும் எழுதப்பட்ட வானியல் பாடங்களைப் படித்து விளங்கிக் கொள்வது எளிதாக இருந்தன.
சோதிடத்தில் பயன்படுத்தப்படும் இலக்கினம், தெசை, ராசி, வீடு, பாவம், கோசாரம், உச்ச நீச்சம், பார்வைகள், சந்திர பலன், சூரிய - சந்திர ஓரைகள், பஞ்சவித நிலைகள் முதலியவற்றைத் திருத்தமாக விளங்கிக் கொள்ளப் பல நாள்கள் எடுத்தன.

சோதிட சாத்திரம் தொடர்பான அய்யங்களை மின்னஞ்சல் மூலம் பல சோதிடர்களிடம் கேட்டுத் தெரிந்து கொண்டேன்.

இதனால், தொடக்கத்தில் குழப்பமாக இருந்த சோதிடம் - வானியல் இரண்டையும் பின்னர் நன்கு விளங்கிக் கொள்ள முடிந்தது.

இணைய தளத்தில் பிறந்த ஆண்டு, நாள், நேரம், இடம் (குறுக்குக் கோடு, நேர்க்கோடு) இவற்றைக் கொடுத்தால் அய்ந்து வினாடியில் சோதிட மென்பொருள் சாதகம் (நவாம்சம் உட்பட) கணித்துக் கொடுத்துவிடும்.

பிறந்த ஆண்டை மாற்றினால் சில கோள்களின் நிலை மாறுவதைப் பார்த்தேன். பிறந்த நேரத்தை கூட்டிக் குறைத்தால் வரிசையாகத் தோன்றி மறையும் பிறப்பு இலக்கினம், பிறப்பு இராசி, பிறப்பு நட்சத்திரம் மாறுவதைக் கவனித்தேன். ஏன் அவ்வாறு மாறுகின்றன என்பதை இந்த நூலைப் படிக்கும் பொழுது தெரிந்து கொள்வீர்கள்.

திறந்த மனத்தோடுதான் சோதிடத்தைப் படித்தேன். படித்து முடித்த பின்னர் அதில் இருந்த கொஞ்சநஞ்ச நம்பிக்கையும் முற்றாகப் போய்விட்டது.

சோதிடம் சரி, சோதிடர்கள்தான் பிழையாகக் கணித்துச் சொல்கிறார்கள்? இது பலர் என்னிடம் கேட்கும் கேள்வி ஆகும்.

எனது விடை 'சோதிடம் கட்டி எழுப்பப்பட்டுள்ள அடித்தளமே தவறானது என்பதாகும். பல கோடி கல் தொலைவில் உள்ள கோள்கள், பத்து, நூறு, ஆயிரம் ஒளி ஆண்டுகளுக்கு அப்பால் உள்ள இராசிகள், நட்சத்திரங்கள் புவியில் பிறக்கும் குழந்தையைப் பாதிக்க வழியே இல்லை! அப்படியிருக்க அதன் அடிப்படையில் எந்தப் பெரிய கெட்டிக்காரச் சோதிடனும் எவ்வளவு நுட்பமாகக் கணித்துப் பலன் சொன்னாலும் அது பிழையாகவே இருக்கும்! சோதிடம், இல்லாத ஊருக்குப் போகிற வழி சொன்னவன் கதையாகும்.

நாம் வாழும் புவி ஞாயிறு குடும்பத்தின் நடுவில் இருக்கிறது, அசையாமல் இருக்கும் புவியை ஞாயிறு உட்பட ஏனைய கோள்கள் சுற்றி வருகின்றன என்ற அடிப்படையிலேயே சோதிட சாத்திரம் எழுதப்பட்டுள்ளது. அதன் அடிப்படையிலேயே சாதகம் கணிக்கப்படுகிறது. ஆனால் உண்மை அதுவன்று.. புவியும் ஏனைய கோள்களுமே ஞாயிறைச் சுற்றி வருகின்றன. மேலும் நாம் வாழும் புவிக் கோள் சோதிட சாத்திரத்தில் முற்றாக விடுபட்டுப் போய்விட்டது.

சோதிடப் புரட்டு முழகத்திலும் தமிழ்நாதம் இணையதளத்திலும் வெளிவந்து கொண்டிருந்த வேளை அதற்குப் பெரிய ஆதரவு படிப்போரிடம் இருந்து கிடைத்தது. அது, இத் தொடரை எழுதி முடிக்கத் தூண்டுகோலாக அமைந்தது.

கட்டுரைகள் ஒவ்வொன்றையும் எழுதப் பல நாள்களைச் செலவழித்துள்ளேன்.

சோதிடப் புரட்டை நூல் வடிவில் கொண்டுவர முடிவு செய்த பொழுது நான் முன்பு எழுதியவற்றைப் பட்டறிவின் அடிப்படையில் பல முறை மீள் பார்வை செய்து செப்பனிட்டேன். அவ்வாறு செய்யவும் பல திங்கள்கள் எடுத்தன.

இந்த நூலில் சில வடமொழிச் சொற்களை விலக்க முடியாத காரணத்தால் சேர்த்துள்ளேன். சோதிடம் தமிழரது சாத்திரம் அல்ல. இது வடமொழிக்கும் வேத கால ஆரியருக்கும் உரியது. எனவே அதனை முற்றிலும் தனித் தமிழில் எழுத முடியவில்லை. முடிந்த மட்டும் எழுத முயற்சித்துள்ளேன்.

சோதிடம் பற்றி எழுதும் பொழுது குழப்பம் ஏற்படாது இருக்க விண்மீனை நட்சத்திரம் என்றும் ஓரையை இராசி என்றும் கோள்களைக் கிரகங்கள் என்றும் ஞாயிறைச் சூரியன் என்றும் நிலாவைச் சந்திரன் என்றும் முழுநிலா அல்லது உவவுமதியைப் பவுர்ணமி என்றும் குற்றத்தைத் தோசம் என்றும் எழுதியுள்ளேன்.

ஆனால், வானியல் பற்றி எழுதும் பொழுது முடிந்தளவு தூய தமிழில் எழுதியுள்ளேன். வருடம், தினம் போன்ற சொற்களை நீக்கி ஆண்டு, நாள் எனக் குறித்துள்ளேன். மேலும் ஜோதிடம், ராசி, நஷ்ஷத்திரம், மேஷம், ரிஷபம் போன்ற வடமொழிச் சொற்களைத் தமிழ் ஒலிப்படுத்தி உள்ளேன்.

கிரேக்க ஆங்கிலப் பெயர்ச் சொற்களின் உச்சரிப்புச் சரியாக இருக்க வேண்டும் என்பதற்காக இரண்டொரு கிரந்த எழுத்துக்களைப் பயன்படுத்தியுள்ளேன். மேலும் பிறர் கூற்றை மேற்கோள் காட்டும் பொழுது அவர்களது கொடுந்தமிழை மாற்றாது அப்படியே கையாண்டுள்ளேன்.

எனது நண்பர் திரு. சண்முகம் குகதாசன் கையெழுத்துப் படியைப் ஒப்பு நோக்கிப் பார்த்துப் பல வடசொற்களை நீக்கித் தனித் தமிழில் எழுத உதவினார். இலக்கணப் பிழைகள் களைவதற்கும் கை கொடுத்தார். அவருக்கு எனது நன்றியைத் தெரிவித்துக் கொள்கிறேன்.

நூலுக்கு ஒரு முன்னுரை தேவைப்பட்ட போது என் கண் முன் நின்றவர் தமிழீழ அரசவைப் பாவலர் காசி ஆனந்தன் ஆவார். அவர் அன்னை தமிழை உயிருக்கு உயிராகக் காதலிக்கும் பாவலர்! அவருக்கு எனது நெஞ்சார்ந்த நன்றி.

இந்த நூலை எழுதியதன் தலையாய நோக்கம் தமிழ் மக்களை முடைநாற்றம் வீசும் மூட நம்பிக்கைச் சேற்றில் இருந்து மீட்டு அவர்களைப் பகுத்தறிவு மணம் கமழும் மாளிகையில் குடியிருத்துவதே ஆகும்!

குறிப்பாகத் திருமண காலத்தில் சாதகம் பார்க்கும் பழக்கத்தைத் தமிழ்மக்கள் முற்றாகக் கைவிட வேண்டும் என்பது எனது பெரு விருப்பாகும்.

அடித்தளம் பிழையாக உள்ள ஒரு போலிச் சாத்திரத்தின் அடிப்படையில் கணிக்கப்படும் சாதகத்தை வைத்துத் திருமணப் பொருத்தம் பார்த்து திருமணம் செய்வது பகுத்தறிவுக்கு ஒவ்வாத செயலாகும். உலகில் 13 இலக்க வகை விலங்குகள் உண்டென்கிறார்கள். ஆனால் மாந்தனுக்கே ஆறாவது அறிவான பகுத்தறிவு இருக்கிறது. இருந்தும் பலர் அதனைப் பயன்படுத்த மறுக்கின்றனர்.

கல்வி, அழகு, செல்வம், குணம், நடை, குடி ஆகிய பொருத்தங்கள் ஆண் -பெண் இருபாலாருக்கும் இடையில் அமைந்திருந்தும் கிரகப் பொருத்தம் நட்சத்திரப் பொருத்தம் இல்லை என்று கூறி அந்தத் திருமண இணைப்பு புறந்தள்ளப்படுகிறது. இது பெரிய கொடுமையாகும்.

அதே வேளை பிழையான சோதிடத்தின் அடிப்படையில் மனப் பொருத்தம் இல்லாத ஆண் - பெண் இணைக்கப்படுகின்றனர்.

பன்னிரண்டு பொருத்தத்தில் 11 பொருத்தம் சரி வந்து செய்த திருமணம் முறிந்து போய்விட்டதாக ஒரு சோதிடர் எழுதியுள்ளார். இது கூடக் குற்றமில்லை. சோதிடர்களின் பிள்ளைகளே திருமணம் முடித்த சில ஆண்டுகளில் கைம்பெண்ணாகி உள்ளனர். இது சாதகம் பார்ப்பதில் எந்தப் பொருளும் இல்லை என்பதற்கு நல்ல சான்றாகும்.

எனக்குத் தெரியச் சாதகப் பொருத்தம் இல்லை என்பதை மீறித் திருமணம் செய்து கொண்டோர் குழந்தை குட்டிகளோடு மகிழ்ச்சியாக இருக்கின்றனர். அதே சமயம் பொருத்தம் பார்த்துச் செய்து வைத்த திருமணங்கள் சில மணப்பிரிவில் அல்லது மணமுறிவில் முடிந்துள்ளன!

திருமணம் வெற்றி பெறுவது திருமணம் செய்து கொள்ளும் மணமகன் - மணமகள் இருவரது கைகளிலேயே பேரளவு தங்கி உள்ளது. அவர்களது தாய் தந்தை உற்றார் உறவினர் பங்கு சிற்றளவே இருக்கும்.

மேலைநாடுகளில் சோதிடம் பார்ப்போர் இருக்கின்றனர். ஆனால், அது பொழுது போக்குக்காகப் பார்க்கப்படுபவை ஆகும். அவர்கள் தங்கள் ளுரn ளபைn யை (பிறப்பின் பொழுது சூரியன் நின்ற இராசி) அறிந்து கொள்வதோடு சோதிடம் பற்றிய அவர்களது ஆர்வம் நின்று விடுகிறது. திருமணம் செய்யமுன்னர் சோதிடரிடம் சாதகங்களைக் கொடுத்துப் பொருத்தம் பார்க்கும் வழக்கம் மேலை நாடுகளில் இல்லை.

ஏன் தமிழ்க் கிறித்தவரிடமும் சாதகம் கணிக்கும் வழக்கமோ சாதகப் பொருத்தம் பார்க்கும் பழக்கமோ இல்லை.

சாதகம் பார்க்கும் வழக்கம் இந்துத் தமிழர்களிடம் மட்டுமே காணப்படுகிறது. என்ன காரணம்?

சோதிடம் இந்து சமயத்தின் ஒரு கூறாக உருவான சாத்திரமாகவும். இருக்கு, யசுர், சாமம், அதர்வணம் என்ற நால்வேதத்தைப் பொருள் அடிப்படையில் ஆறு அங்கங்களாக (வேதாங்கம்) வகுத்து அதில் கர்மகாண்டத்தில் சொல்லப்படும் கருமங்களின் அநுட்டானத்துக்குரிய காலத்தைத் நிருணயம் செய்யும் முறைக்கு ஜோதிஷம் (சோதிடமும் கணிதமும்) எனப் பெயரிட்டுள்ளனர். எஞ்சிய அங்கங்கள் சிஷை (உச்சரிப்பு) வியாகரணம் ( இலக்கணம்) சந்தஸ் (சீர்) நிருத்தம் (பொருள்) கல்பம் (கிரிகை) என்பனவாகும்.

சோதிடத்தைச் சூரியன் முதலான 18 இருடிகள் இயற்றியதாக அய்தீகம். அதனை எல்லோரும் எளிதில் புரியுமாறு சுருக்கி எழுதியவர் வராகமிருகர் ஆவார்.

இவ்வாறு சோதிடம் வேதத்தோடு முடிச்சுப் போடப்பட்டு, இந்து மதத்தின் பிரிக்க முடியாத ஒரு கூறாக இருப்பதாலேயே இந்தச் சோதிட நம்பிக்கை இந்துக்களிடம் மட்டும் காணப்படுகிறது.

எனவே, சோதிடம் போன்ற மூட நம்பிக்கையை ஒழிக்க வேண்டும் என்றால் இந்துக்களது கோயில், குளம், தேர், தீர்த்தம், சொர்க்கம், நரகம், சிறுதெய்வ வழிபாடுகள் போன்றவற்றில் உள்ள மிகு நம்பிக்கையை ஒழிக்க வேண்டும். எது போலென்றால் நுளம்பை முற்றாக ஒழிக்க அது உற்பத்தியாகும் இடங்களை ஒழிப்பது போன்று!
எனவே, சமயம் பற்றிய எனது கருத்துக்களைப் படித்து விட்டுச் சீறாமல் சினக்காமல் நான் சொல்வதில் மெய்ப்பொருள் இருக்கிறதா இல்லையா என்பதை ஆற அமரச் சிந்துத்துப் பார்க்குமாறு வேண்டிக் கொள்கிறேன்.

சிங்கள - பவுத்தர்கள் சோதிடம், நாடி பார்ப்பதில்லையா? எனக் கேட்கலாம். சிங்களவர் பவுத்தர்களாக மதம் மாறு முன்னர் வைதீக மதத்தவராக இருந்தமையே அதற்கு ஏதுவாகும். புத்தர் சோதிடத்தை மிருக சாத்திரம் (Animal Science)  என எள்ளி நகையாடியுள்ளார் என்பது மனங்கொள்ளத்தக்கது.

அரிது அரிது மானிடப் பிறவி அரிது என்று தமிழ்மகள் அவ்வையார் சொன்னது முற்றிலும் உண்மை ஆகும். இந்தப் பிறவியைத் துன்பம் என்று எண்ணாது, உடம்பை இழிவென்று தள்ளாது, வாழ்க்கையை முழுமையாகவும் பயனுள்ளதாகவும் வாழக் கற்றுக் கொள்ளுங்கள். துன்பத்தைக் குறைத்து இன்பத்தைப் பெருக்க நல்வழியில் இடைவிடாது முயற்சி செய்யுங்கள். முயற்சி திருவினையாக்கும் எனப் புலவோர் சொன்னது பொய்மொழி இல்லை!

தமிழருக்கு இறையாண்மை படைத்த அரசு ஒன்று இல்லாததால் மாணவர்களது கற்கை நெறி குமுகாய அறிவியல் அடிப்படையில் வகுக்கப்படவில்லை. இப்பொழுதுள்ள கற்கை நெறி தொழிலை இலக்காகக் கொண்டு வகுக்கப்பட்டுள்ளது. வையத்தில் வாழ்வாங்கு வாழும் வழி என்ன என்பதைப் பள்ளிக்கூடத்தில் யாரும் பாடமாகச் சொல்லிக் கொடுக்பதில்லை. இதனால் நீர்வழிப் படூஉம் புணை போலப் பலரது வாழ்க்கை அமைந்து விடுகிறது.

எப்படி உடல் நோய் தீர மருந்து உண்ண வேண்டுமோ அதே போல் மூடநம்பிக்கை போன்ற குமுகாய நோய்கள் தீரப் பகுத்தறிவு என்ற மருந்தை உட் கொள்ள வேண்டும். ஏனைய இனங்களோடு ஒப்பிடும் போது அறிவியல் தளத்தில் தமிழர் மிகவும் பின்தங்கியுள்ளனர்.

இது காரணமாகவே அறிவியலின் இன்றியமையாத் தேவையை இந்த நூல் நெடுகிலும் வற்புறுத்தி எழுதியுள்ளேன்.

ஒவ்வொரு நாளும் வீட்டைக் கூட்டிக் குப்பைகளை அகற்றித் துப்பரவு செய்கிறோம். தண்ணீரில் குளித்து உடல் அழுக்கைப் போக்கிப் புறத் தூய்மைப் பேணிக் கொள்கிறோம். மனதில் உள்ள சாத்திரக் குப்பைகளையும் சமய அழுக்கையும் அகற்றி அகத் தூய்மை பேண நாம் ஏன் பின் நிற்க வேண்டும்?

திருவள்ளுவர் ஆக்கிய திருக்குறள் ஒரு முழுமையான வாழ்வு நூல் ஆகும். தமிழர்கள் அதனைத் தங்கள் வாழ்க்கைக் கையேடாகவும் வாழ்க்கை வழிகாட்டியாகவும் கொள்தல் வேண்டும். பகுத்தறிவோடு வாழத் திருக்குறள் உறுதியாக உதவும்.

திருக்குறள் வழி வாழ முடியும் வாழலாம் என்பதற்கு நானும் எனது மனைவி பிள்ளைகளும் பேரளவு சான்றாக இருக்கிறோம்! நல்ல குடும்பம் ஒரு பல்கலைக் கழகம் என்ற புரட்சிக் கவிஞர் பாரதிதாசனின் பொன்மொழிக்கு அமையவும் வாழ்கிறோம்.

வாழ்க்கையில் ஏற்படும் பல சிக்கல்களை அவிழ்ப்பதற்கு வேண்டிய வழிமுறைகளையும் நுணுக்கங்களையும் வள்ளுவர் சுருங்கச் சொல்லி விளங்க வைத்துள்ளார்.
நல்ல எண்ணம், நல்ல சிந்தனை, நல்லறிவு, நல்வினை, நற்காட்சி, நயம்பட உரைத்தல், பகுத்துண்டு வாழ்தல், இசைபட இருத்தல் உங்கள் வாழ்வின் குறிக்கோளாக இருக்கட்டும்! அன்பு, அருள், அறன் உங்கள் வழிபாடாக இருக்கட்டும்!

இந்த நூலைப் படித்து விட்டு அதற்கு அணிந்துரை எழுதிய நண்பர் திரு. இலங்கையனுக்கு எனது நன்றியைத் தெரிவித்துக் கொள்கிறேன். என்னைப் போலவே அவரும் ஒரு அப்பழுக்கற்ற பகுத்தறிவாளர் ஆவார்.

இந்த இடத்தில் சோதிடப் புரட்டுத் தொடரை முழக்கத்தில் ஒன்றரை ஆண்டு காலமாக எனது அன்புக்குரிய முழக்கம் ஆசிரியர் திருமுருகவேந்தன் (திரு) மற்றும் முழக்கம் பொறுப்பாசிரியர் வானதி (அன்பரசி) இருவருக்கும் எனது உளம் கனிந்த நன்றி. எனது எண்ணத்துக்கும் எழுத்துக்கும் முழக்கம் வடிகாலாக இருந்து வருகிறது.
சோதிடப் புரட்டை வெளியிட்டதால் முழக்கம் இரண்டொரு விளம்பரங்களை இழந்ததும் உண்டு.

வயலில் நல்ல விளைச்சலை விரும்பும் கமக்காரன் மண்ணை ஆழ உழுது, உயர வரம்பு கட்டி, எருவிட்டு, நல்ல விதை நெல் தேடி விதைத்து, களை பிடுங்கி, உரிய காலத்தில் அறுவடை செய்ய வேண்டும். குமுகாயமும் அப்படியே ஆகும். நல்ல பகுத்தறிவுக் கருத்துக்களை விதைத்து, மூடநம்பிக்கை என்ற களை பிடுங்கி, அறிவைப் பெருக்கினால் மட்டுமே தனி மாந்த வாழ்வு சிறக்கும். தனி மாந்த வாழ்வு சிறந்தால் குமுகாயம் முன்னேறும். இந்தப் பணியில் தங்களை முழுமையாக ஈடுபடுத்திக் கொண்டுவரும் பகுத்தறிவு இணையர் திரு - அன்பரசி இருவருக்கும் எனது வாழ்த்துக்கள்.

முழக்கம் போலவே தமிழ்நாதம் இணையதளத்தில் சோதிடப் புரட்டைத் தொடர்ந்து நல்ல முறையில் வெளியிட்ட தம்பி கரனுக்கும் எனது நன்றி உரித்தாகுக.

ஒருவரது வாழ்க்கையின் வெற்றிக்குப் பின்னால் அவரது மனைவி இருப்பதாகச் சொல்வர். எனது வாழ்க்கையைப் பொறுத்தளவில் இந்தப் பொன்மொழி நூறு விழுக்காடு உண்மை ஆகும்.
எனது எழுத்துப் பணி யாவற்றுக்கும் கை கொடுக்கும் எனது துணைவியாருக்கு எனது நன்றியைத் தெரிவித்துக் கொள்கிறேன். என்னைக் கருத்தோடு கவனித்துக் கொள்ளும் அம்மம்மா (மாமி) எனக்கு வேண்டிய மருந்து முதல் விருந்து வரை குறிப்பறிந்து கவனித்துக் கொள்ளும் மக்கள், மருமக்கள், பேரப்பிள்ளைகள் எல்லோருக்கும் எனது நன்றியைத் தெரிவித்துக் கொள்கிறேன்.

முடிவாகச் சாதி சமயமற்ற சங்க காலமே (முற் பகுதி) தமிழரது பொற்காலம் என்பது தமிழறிஞர் கருத்தாகும். அந்தப் பொற்காலம் நாளை மலர இருக்கும் தமிழீழத்தில் மீண்டும் பிறக்க வேண்டும் என்பதே என் ஆசை. என் ஆசை விரைவில் நனவாகும் என நம்புகிறேன்.

இன்பமே எந்நாளும் துன்பம் இல்லை!

நக்கீரன்